- Tluangpuii Hmar
Khawvawt hrehawma nalh tura thawmhnaw pan tê tê inbel kher lo a incheina dan tur, kan mamawh zualpui leh kan ban phak maia awm ṭhenkhat kan tarlan ang.
Pocket Scarves: Thlasikah hian kan thil uar hi kum tin hian a inthlak em em hran loa, mahse i scarf hlui te kha han chei ṭha la, i kut tihlum nan a hmawr tawn tawnah ipte han bel la, anih loh vek pawhin i scarf hmawrah khan la i dah hniar chawp thei a, i rawng duh dan danin i siam dawn nia.
Popping colours: Thlasikah hian rawng eng lampang a hakna khua lo tih ngaidan hi thlak a hun tawh. Rawng thianghlim lampang thawmhnaw i hak hian thlasikah i lang fresh a, a dum lam ringawt inbel hi a out’ deuh tawh. Chuvangin nude colour a i inchei te hian thlasikah i langeng’ dawn tihna mai a nih chu. A tam ber hian rawng thim duk khuk hi kan inbel tlangpui ṭhin, tun ṭum chu a dangdai ni turin rawng dal da lampang leh lei rawng deuh te kan uar dawn chauh niin a lang. Lo ti hmasa teh, i langsar khawp ang. Hmeichhe tan chauh a ni lo a nia, mipate tan hlei hlei, mipa lam phei chu in dum leh ṭhup dawn a nia, rawng lar leh nipui rawng ho kha i lo inbel daih dawn nia.
Quilting: Thlasikah hian Quilt jacket hi mi chi hrang hrangin anlo ha chhuak leh ang a, amaherawhchu Quilt hi jacket ah ringawt niloin, Quilt boots te hi i rawn uar hmasa dawn nia.Jacket emaw kawrlum hnuaia guilt top hak hian pian a thup thei viau a,kawng fek tan erawh a uihawm deuh.Quilting hi Aizawlah pawh puanthuina dawr hrang hrang i tihtir thei ang.Quilt Jacket te hi mipa tan a mawi hlei hlei ania,hmeichhe ho sawi dan takah a pa,a dangdai,lo ha thuai roh,I thianten hak na chang an hre vak dawn miahlo nia.
Printed Leggings: Kum tin hian leggings hi chu kan uar viau zel a, a plain ngawt ai chuan printed leggings hi ha la, i nalh lehzual ang. Internet lamah pawh chah tur a tam hle a. Hand printed leggings pawh i siam chawp thei. Fabric paint lei la, lemziak thiam mi i nih hlauh phei chuan i duh rawng ho hmang khan leggings plain tawp kha i duh dan takin han chei la, beads leh sequins te fabric glue hmangin bel khawm la, a tle deuh sep sep ngaina tan phei chuan mahni siam ngei hak kha a dangdai viau dawn a ni. Sparkle glue hmang pawhin i duh ziarang i lo siam chawp ve tawh mai dawn nia. Mipa lam tan kan denim te khua a’n vawh tak tak chuan hakin a hik vur ṭhin, a hnuaiah leggings lo ha ve tawp rawh, a lum nuam bakah a ṭhing lem lo bawk.
Fur Coat: Fur hi thlasik laia min ticheitu pakhat leh chu a ni. Fur trims hi Aizawlah pawh kawrcheina dawrah i zawng thei ang. I jacket lukhum tlanga a awm ringawt pawh khan a tilang pui thei che a, nutlingin fur coat an hak phei chuan an lang pui nghal ruih zel a ni. Amaherawhchu Fur tel thawmhnaw i hak dawn chuan i ngaihtuah chian phawt a ngai ang. Mi ṭhenkhat chuan ran leh ramsa laka nunrawnnaah an ngai.
Designer Robert Cavalli chuan a winter collection-ah fur a uar em em laiin Designer Stella Mecartney erawh chuan leather leh fur a thuamhnawa hman a duh tawh lo. Chuvangin sahuan velah fur coat nena intih nalh chu a chi viau loh tihna a nih chu. A pawimawh ber chu tun thlasikah hian nalh si nangmah tilum tho tur si kha i zawn thiam a ngai. Mizote kan thiam tawk loh ṭhin. Kan inbel tamin kan tih ṭup zel a, chubakah a lum dawn chuan ṭhin tur emaw kan ti tlat ṭhin hi a pawi. Vawt ti chunga nalh viau ai chuan, khing kan sawi tak te khi inbelin lum tak siin i lo nalh viau dawn nia