Delhi bakah Uttar Pradesh leh Bihar hmun tam tak chu Pathianni khan khaw vawt uchuak tak leh chhum leivak nasa takin a la bawh avangin thlawhna, rel leh inkalpawhna dang dangte a buai phah.
Indian Meteorological Department (IMD) chuan Delhi-ah hian 10°C-a vawt a nih thu leh a lum ber laiin 21°C a nih thu a sawi.
Pathianniah hian Indira Gandhi International Airport-ah chuan thlawhna thlawk chhuak tur tam tak tihkhawtlai a ni a. Relte pawh New Delhi Railway Station-ah chhum leivak zing nasa lutuk avangin an che thei hlawm lo.
Zing hma takah atangin mi tam tak an buai hlawm a. “Bus-a Noida pan tur ka ni a, a vawt lutuk hi a hrehawm hle a ni,” tiin Jithendra chuan ANI hnenah a sawi.
Angith Sing-a pawhin khaw awm dan uchuak lutuk avangin a bike khalh a harsa tih a sawi.
“Zan lama ka thawh zawhah Jor Bagh atangin ka haw a, kawng lakah a vawh lutuk avangin ka bike pawh ka khalh hleithei lo va, chawlh a ngai hial,” tiin Vikas Marg-a a chawlh laiin a sawi.
“Kawr pali ka hak thuah a. Nikum tun ang hunah kha chuan T-shirt nen mai ka awm tawh a, tunah chuan a vawt tak zet a ni,” a ti.
IMD-in a chhinchhiah dan chuan ram khawpui berah hian nikum thlasik aiin khaw vawh dan chawhrual hi a vawt daih zawk a ni.
Inrinniah khan a vawh lai berin 4.3°C niin a nih dan pangngai aiin 4°C velin a vawt zawk niin IMD chuan a sawi.
IMD hian Uttar Pradesh leh Bihar-ah chhum leivak nasa takin a zing niin a sawi a, Tripura-ah pawh a zing nasa hle bawk.
“Khaw hmuh theih chin hi Varanasi (Babatpur) leh Purnea-ah chuan metre 25 chauh a ni a. Bahraich, Lucknow, Gorakhpur, Sultanpur leh Kailashahar-ah pawh metre 50 chauh niin Patna-ah pawh metre 200 a ni,” tiin IMD hian X-ah a tar lang.
Khua hi vawtin chhum zing nasa hle mah se Ayodhya-ah chuan Pathianni tuk hma takah khan Shri Ram Janmabhoomi Temple-a pathian be turte chu an kal tho a ni.
Ayodhya-ah hian Hanumangarhi Temple-ah pawh pathian be tur tam tak an kal tho bawk.