Manchester United in FA Cup-ah round nga na awlsam taka lut tura ngaih an nihlaiin an tum ang vekin khelmualah hun an hmang lo. Goal li khung thei mahse England a football inchherchhuan dana a sang palina a khel Newport County chu 4-2 in an hneh hram.
Pathianni zana Fourth round inkhelah United hian Wales rama Newport khua a Rodney Parade khelmual tereuhte an tlawh a ngai a, chak ngei tura ngaih an ni a, chutihrualin tunhnaia an team dinhmun leh inkhelh dan thlirin inrintawkna an nei sang lo.
An tum ang ngei erawhin bul an tan a, minutue 7-naah Bruno Fernandes hmanga goal khung nghalin minute 13-naah rawlthar midfielder Kobbie Mainoo chuan club tana a goal hmasa ber a khung a. An dinhmun a tha.
Alejandro Garnacho hmanga goal ban an tih per bawk hnuah United in ze ngai an chhuah a, zawi zawiin an tlahniam.
Minute 36-naah Bryn Morris goal shoot chu dan pial niin United goalkeeper Altay Bayandir-a’n a ban pha lo chhiava a. Second half tan veleh Will Evans chuan striker goal tha a khung leh bawk.
United barakhaih an nih hnuah erawh an insiamtha a. Luke Shaw thawhrah atang Antony chuan an goal thumna khungin forward dangten an chawm loh striker Rasmus Hojlund chuan huntawp dawnah a goal shot hmasa berah goal a khung leh bawk.
Red Devils hian fifth round-ah hian Bristol City emaw Nottingham Forest an hmachhawn leh ang.
- Reds an chak
Liverpool manager Jurgen Klopp-a’n season tawpah club a chhuahsan dawn tih a sawi hnua inkhel hmasa berah inkhel hmuhnawm takah a pawlten hnehna an chang a, Norwich City 5-2 in an hneh.
Championship a khel mek Norwich lakah hian Anfield-ah Liverpool in Curtis Jones hmangin gola an khung hmasa a. Hei hi Ben Gibson chuan a sut a. Reds tan Darwin Nunez leh Diogo Jota ten goal an khung leh hnuah Borja Sainz hmangin Canaries in an khung a. Mahse Reds in Virgil van Dijk leh Ryan Gravenberch te hmangin goal an khung belh leh tho a ni.
Reds hian fourth round-ah Watford leh Southampton inkhel a chak zawk an hmachhawn ve thung ang.