Mizoram MP K.Vanlalvena’n Mizoram chhim tawpa Myanmar atanga raltlan naupangte sikul zirtirtu hlawh a tum pui tur thu a sawi.
Rajya Sabha MP K Vanlalvena hian chawlhkar kalta Nilaini atanga Inrinni thleng khan, zan thum riakin Mizoram chhim tawp lama Myanmar ramri dep khaw thenkhatte a tlawh a. Myanmar refugee hruaitute nen Chapui khuaa an inkawmnaah raltlan naupangte sikul zirtirtu hlawh a tum pui tur thu hi a sawi a ni.
K Vanlalvena hian, Chapui khaw chhung mite nena an inkarah harsatna awm thei chi hrang hrangte a sawipuiin, “Hmangaih taka lo tuamhlawmtu Mizoram mipuite laka that chhuah let ve chu raltlante tihmakmawh a ni,” a ti.
Mara District leh Lai district-a Model Villate pahnih Phura leh Pang khua te tlawh bawkin, K Vanlalvena hian Phura khawtlang tihhmasawn dan tur hrang hrang te khawtlang hruaitute a sawipui bakah, Pang khua chu international trade route pawimawh tak la ni tur a nih avangin lirthei kawng sialna tura zangnadawmna avanga harsatna awm thinte tihkian a pawimawh thute a sawi pui bawk.
Mizoram MP hian Myanmar ramri khaw eng emaw zat tlawhin, Indo-Myanmar ramri hung tumna awm mekin a nghawng theih tur te zir chiang pahin ramri depa awm mipuite ngaihdan a zawt pah bawk a. Myanmar nena Mizoram inkar ramri thui tak hi |iau lui leh Chhimtuipui lui te a nih avang leh heng luite hi pi leh pu atanga an lui ramvahna an nih avangin, heng lui pahnih te ramri hung pawna dah hi pawm theih a nih loh tur thute an lo thlen chu, sorkar laipui hotute hnenah thlen ngei a tum K.Vanlalvena chuan a hrilh a ni.
K Vanlalvena hi Tuipang SDO Civil R.Lalnunkimi’n a tawiawm a ni.