Aizawl: Parliament Budget Session neih tur inbuatsaihna nimina neih, all party meeting-ah Rajya Sabha MP K.Vanlalvena’n Indo-Myanmar border fencing siam tumna awm chu thulh a tul thu a sawi.
Parliament Library building-a all party leader thutkhawmah, vawiina tan tur parliament budget session thlirlawkna neih a ni a. He hunah hian Mizoram MP K.Vanlalvena’n thu sawiin, “Colonial period-ah British roreltu ten Mizote chenna ram chu hmun thum India, Bangladesh leh Myanmar-ah te min then darh a, insuihkhawm leh hlan nghakhlel taka kan thlir reng laia Indo-Myanmar border fencing lo siam hi, kan political goal tih hlawhchhamna tur a nih theih avangin tih loh tur a ni,” a ti.
K Vanlalvena chuan Bangladesh ramri hung pawh Mizoram khawthlang lamah siam a lo ni tawhin, a hmun ngeia a tlawh tawh thu te, khaw thenkhat phei chu fencing pawnah a awm thu te, ramri lui thui tak sangha manna hmun tha tak tak hung pawnah dah a nih thu te leh Mizorama Indo-Bangladesh border fencing pawh hi thiah leh a tul thute a sawi bawk.
Mizoram MP hian, “Myanmar sipai sorkar a chak lo tial tial tawh a, Chin Hills mipuite nen kan inkungkaih thuk tial tial a, Indo-Myanmar ramri hung kan duh tak zet a nih chuan Chin State pum pui huam vekin kan hung tur a ni,” a ti bawk.
All Party meeting hi Union Defence Minister Rajnat Singh-a’n a kaihruai a, Parliamentary Affairs Minister pahnih Pralhat Joshi leh Piyush Goyal ten an kaihruai a ni.