Aizawl: Zirlaiten a hun taka an zirlaibute an dawn theih nan Printing & Stationery Department Minister F. Rodingliana’n Zirtawpni khan Guwahati-a Mizoram school zirlaibu chhutna hmun a tlawh.
F Rodingliana chuan Guwahati-a sikul text bu chhut mekna printing press hrang hrang a tlawh kual a. Panikhaiti-a Saraighat Photo Types Pvt. Ltd.,-ah company neitu hrang hrangte a kawmin, zirlaibu chhutna hmun a tlawh chhan te leh sorkar hmachhawpte a sawipui.
F Rodingliana chuan sikul naupang zirlaibu chhut mek chu ngaih pawimawh ngai bik a nih thu sawiin, zirlaibu quality tha siam a tul thu leh a hun taka zirlaibute zirlaite hnenah sem chhuah a nih theihna turin zirlaibu chhutna hmun ngeiah a enfiah tih a sawi.
Minister hi Josephine Zonunsangi, Deputy Controller, Printing &Stationery Department leh Er. Vanlalmuanchhana, Principal cum Project Manager, Printing & Stationery Department bakah Dr Malsawmtluanga Fanchun, Deputy Resident Commissioner, Mizoram House Guwahati ten an tawiawm a ni.