Aizawl: Animal Husbandry & Veterinary Minister C. Lalsawivunga’n hand holding policy hnuaiah ar leh vawk vulhna lam hawiin scheme an buatsaih mek tih a sawi.
Tun hnaia chanchinbu mi thenkhatin an kawmnaah vety minister chuan ZPM policy hand holding policy hnuaia vety department-in hma an lak dan tur sawiin, “Hand holding policy hnuaiah hian ar leh vawk vulhna lam hawiin scheme kan buatsaih mek a, helama tui mi entrepreneur-ten ke an pen chhoh theihna tur atan ruahmanna a kal mek,” a ti.
Sawivunga chuan vety department a enkawl hnuah ran vulhtute dinhmun hrechiang turin bawng, vawk leh ar an vulhna hmunte an luh chilh thu sawiin, chuta tanga an rilrua lian ta ber chu ran chawa intodelh thuai a tul an tih thu sawiin, ran chaw siamna changtlung tak din turin ruahmanna an siam chhoh thute, a chaw siamna tur vaimim chu department-in man tlawm zawka a lei theih nan support price pek dan turte an ruahman chho a, hma thar lak an tum thu a sawi.
Minister chuan artuia intodelh tur pawhin ruahmanna an nei a, project lian tham siam an tum thu sawiin, bawnghnutea intodelh tura ruahmanna an neih sawi bawkin, an ruahman ang a kal thei a nih chuan budget tharah bawnghnute leina tu support price dah zawnga kal an tum thu a sawi.
Saah Mizoram a intodelh rih loh avangin state pawn atangin lak luh a tam lo thei lo tih a sawi a; “Saa intodelh turin hma kan han la chho zel anga, state pawn atanga lak luh chungchangte kan la ngaihtuah chho zel ang chu,” a ti bawk.