Aizawl: Mizoram Pradesh Congress Committee (MPCC) Treasurer Dr Lalmalsawma Nghaka chuan Kolasib district-a hmunphiah chingtute harsatna chu sorkarin chin felsak thuai turin a ngen.
Inrinnia Tuirial, Kolasib leh Serlui biala Congress Block hruaitute nen an inkawmnaah Dr Lalmalsawma Nghaka chuan Kolasib district-a hmunphiah chingtuten hmunphiah hralhna kawngah harsatna an tawk chu pawi a tih thu a sawi a. Sorkarin hmunphiah lei turin RR Associates, Kamrup, Assam thawhpui a, hmunphiah ro, Kg 1-ah Rs 100 aia tlawm loa leisak tura ruahmanna a siam chu thil lawmawm tak angin lang mah se, hmunphiah chu a hringa hralhtu tam tak an awm avangin a hralhna chungchangah kum dang aiin harsatna an tawh nasat phah zawk niin a sawi.
Dr. Lalmalsawma Nghaka chuan nikum 2023 January-Febuary-ah hmuhphiah chu kg 1-ah Rs. 50 a ni zet a, a to hnuah Rs. 60-in an hralh a, kuminah erawh kg 1-ah Rs. 34 a ni thei tawk tih a sawi a. Sorkarin hmunphiah ro man, kg 1-ah Rs. 100-a a siam chu a ro-a pek tur a nih si avangin hmunphiah hralhtute tan nikum lama a hringa an hralhna aiin a rate a chhiat zawk avangin, kum dang aiin an hlawk lo zawk a, mumal taka a hralhna a awm theih loh avangin kuthnathawktute phurrit a thlen phah tih a sawi bawk.
Hei mai bakah Vairengte Aitlang rama hmunphiah chingtute hmunphiah chu Assam Police-in an kehsak thin chu pawi a tih thu sawiin, sorkarin a rang lama chin felsak turin MPCC treasurer hian a ngen a ni.