Chief Minister Lalduhoma’n Zoram Medical College (ZMC) chu sorkar laipui kutah pek a ni leh dawn lo niin a sawi.
Inrinni zing khan chief minister leh Health minister Lalrinpuii hoin Aizawl South II bialtu MLA Lalchhuanthanga, Chief Secretary Renu Sharma leh health department hotute chuan Kulikawn Hospital tihlen dan tur leh tihchangtlun dan tur an en ho a. He hunah hian chief minister chuan he thu hi a sawi.
Central-a ZMC pek an tih chhan sawiin chief minister chuan, “Kan sum dinhmunin a zir loh vang a ni a. Central-ah pawh pe ila kan quota hi a bo dawn reng reng lo a. Amaherawhchu, tun hnaia health minister-in sorkar laipui hotute a dawrnaah ‘Mizoramin medical college a neih chhun, ZMC chu central-in an enkawl dawn a nih phawt chuan kan rawn dawmkang ang che u’ an lo tih hlauh avangin central kutah pek a ngai dawn ta lo a ni,” a ti.
Chief minister hian Civil Hospital, Aizawlin mipui a dawl zo meuh tawh lo va, Kulikawn Hospital chu Mizorama Psychiatry Hospital neih chhun, Civil Hospital, Aizawl tihlenna hun remchang a nih bawk avangin an sum neihte tlem hle mah se a tihlenna atan hian Rs vbc 67.62 dah a nih thu a sawi.
Sum hi hmun tam takah tangkai taka semzia theih la ni mah se, Kulikawn Hospital chu a pawimawh avangin an ngaih pawimawh thu sawiin Lalduhoma chuan, “Hnathawh kawngah te, building sak a lo nih hunah pawh ngun takin kan vil reng dawn a, khawtlang hruaitute leh NGO lamte pawhin tha taka hospital tha tak kan neih theih nan kan thawh ho a ngai dawn a ni,” a ti.
Kulikawn Hospital hi thangkhat lian zet din ni tawhin, Health Department-in tunah hian an enkawl mek a, khum 50 awm theihna niin, rilru lama buaina nei enkawl ngaite enkawlna hmun Mizoramin a neih chhun a ni bawk.