Aizawl: Chief Minister Lalduhoma chuan Mizoram sorkar sum dinhmunin a tlin ngang loh avangin a enkawl theitu te hnenah Lengpui Airport chu hlan mai tura hmalak mek a nih thu a sawi.
Inrinnia Kulikawn Hospital an tlawhnaa chief minister Lalduhoma chuan, “Kan Airport neihchhunte hi tha se, changtlung se, chhuan tham ni se kan duh a, kan sum neihin a tlin ngang si lo va; chuvangin a enkawl theite hnena hlan hi kan duh dan a nih phah ta a ni,” a ti.
Sum tam tak sengin Lengpui Airport chei that hna thawktu Kamrula te hna a chhiat thu sawiin Lalduhoma chuan, “Tunah hian an hna a chhiain estimate lo ang hlirin an thawk a, tunah tak phei chuan hna hi an thawk hleithei tawh lo va, hnathawktu chhawr man ringawt pawh cheng vbc 5 vel ba an nei a. Chuvang chuan, labour tur pawh an hmu mang tawh lo a, a manganthlak em em a, pawisa an lo la hnemin an lo la deuh vek tawh si a, tihngaihna hi a vang em em a ni,” a ti.
ZPM sorkar chuan quality tha lo an duh lo tih sawiin chief minister chuan, “CM office-ah endiktu dah an ni tawh a, hna reng reng a tha tur a ni a, a hun takah an zo ngei ngei bawk tur a ni,” tiin, hetiang hi mipui rawngbawlna mai a nih loh thu leh Pathian rawngbawlna a nih avangin, sorkar official te pawh hian thil tha an duh a, anni pawhin tu leh fate chhawm tlaka hna tha leh rintlan hna an thawk zel dawn niin a sawi bawk.