Zirtawp zan leh Inrinni zan khan Asian Cup quarter-final khelh a ni a, team lian South Korea leh Iran in semi-final an lut a. Champion lai Qatar leh Jordan in quarter-final an paltlang ve bawk.
Quarter-final hmasa berah Tajikistan leh Jordan te chu Ahmad bin Ali Stadium-ah an inhmachhawn a. Inkhel hmuhnawm takah Jordan an vannei a, minute 66-naah Vahdat Hanonov own-goal an chakpui a, si khat faia hnehna changin semi-final an lut.
Inrinni zan vek hian champion tura rinkai pahnih Australia leh South Korea te chu Al Janoub Stadium an inhmachhawn ve thung a, tlawm zawkah South Korea an tang teuh hle. Champion tura rinkai zinga mi Australia tan hian Craig Goodwin chuan minute 42-naah hmahruaina goal a thun. Goodwun goal thun hi an chakpui teuh hle a, hun pek belh tawp dawn tepah goal an chhuah ta tlat thung. Tlawm ngei tura ngaih ni hman South Korea tan hian Hwang Hee-Chan chuan minute 90’+6-ah penalty pet goal in an si phurh a sut a, tlawm an pumpelh hlauh.
Hun pangngaiah chak zawk an awm theih loh vangin extratime minute 30 dang an khelh belh. Hun pek belhah Korea an khel tha a, inrtawkna sang zawk an neih bakah an phur thar hle. Minute 104-naah Tottenham captain Son Heung-Min chuan hma an hruai letna goal pawimawh zet mai a thun. Goal an chhuah hnu lawkah Australia an vanduai zui nghal zat a, minute 105+4-naah Aiden O’Neill hnawhchhuah a ni. Tlem zawk ni chunga si phur Australia hian an si phurh an sut thei tawh lova, uiawm taka tla in, an puanthuah an tel.
Inrinni zana quarter-final hmasa zawkah team lian pahnih Iran leh Japan an inhmachhawn zui ve leh. Education City Stadium-a inkhel hmuhnawm takah he inelnaa champion ngun ber Japan in bul an tan tha a, minute 28-naa Hidemasa Morita goal thun hmangin hma an hruai. Vawi thum champion tawh Iran hian chawlhlawk hmain an si phurh sut thei lo mah se, chawlhlawk hnu lamah goal hnih thunin Japan an lehthal.
Iran tan hian Mohammad Mohebbi chuan minute 55-naah goal thunin an si phurh a sut. 1-1 a nih hnuin goal thun thei an awm lawk lova, an inhnehtawk rei hle. Extratime khelh a ngai ngei tura ngaih a nih laiin hun tawp dawn hnaihah Iran an vannei a, penalty an hmu. He penalty hi Alireza Jahanbakhsh chuan pet goal in, goal pawimawh zet mai a thun a. Japan lakah 2-1 a hnehna changin semi-final an lut zui ta a ni. Iran hian nilai zan khian champion lai Qatar an hmachhawn zui leh dawn a. Final luta an champion a nih chuan he inelnaa champion ngun ber Japan record an nihrual ang.
Inrinni zana semi-final hnuhnung zawkah inelna thlengtu leh champion lai ni bawk Qatar chuan Al Bayt Stadium-ah Uzbekistan an hmachhawn a, hun pangngaiah 1-1 an inhnehtawk hnuinpenalty-ah Qatar in hnehna pawimawh an chang.
An muala inlan Qatar hian minute 27-naa Utkir Yusupov own goal hmangin hma an hruai a. Uzbekistan lamin minute 59-naa Odiljon Xamrobekov goal thun hmangin an si phurh an sut ve thung. Extratime zawh thleng goal lut a awm theih loh vangin tie-break hmangin thelh an ni. Tie-break-ah hian Qatar lamin vawi hnih thelh bawk mah se Uzbekistan lamin vawi thum an thelh ve thung a, vanduai zawkah an tang zui ta a ni.
AFC Asian Cup semi-final hi thawhleh zan leh nilai zanah khelh a ni dawn. Thawhleh zanah South Korea leh Jordan an inhmachhawn ang a. Nilai zanah champion lai Qatar leh vawi thum champion tawh Iran an inhmachhawn ve thung ang.