US State Department chuan India hnena $ tluklehdingawn 4 dawn man drone, missile leh sipai hmanraw dang 31 hralhna tur a pawm.
MQ-9B Predator drone inleisakna tur hi June, 2023-a Prime Minister Narendra Modi-a’n US a tlawh tum khan ruahman a ni.
December thla khan US leilunga Indian-in mi thah a tum nia hriat avangin Senate committee chuan chhui chhung a tikhawtlai thung.
US Congress-in tunah chuan a pawm tak avangin ralthuam hi an inleitir ngei dawn tih a chiang ta a ni.
India-in a leisak tur zingah hian MQ-9B SkyGuardian drone 31, AGM-114R Hellfire missile 170 leh laser small diameter bomb 310, communications & surveillance equipment leh precision glide bomb a tel dawn niin Pentagon chuan a sawi a. General Atomics Aeronautical Systems chu he inleina turah hian contractor a ni dawn a ni.
Senator Ben Cardin chuan US sorkarin inthah tumna awm nia sawi chu engkim chhui a phalsak tak avangin ralthuam inleisakna tur a dan chu a titawp ta tih a sawi niin Reuters news agency chuan a tar lang.
“Biden-a sorkar chuan US-a mi thah tumna chhui chhuahna leh hetiang thil dang a awm em tih thlenga chhui a phal a, India-ah pawh hetiang chi a awm em tih thlengin ngaihven a phal ta a ni,” tiin Cardin chuan thuthar lakhawmtute hnenah a sawi.
Nikum khan US hian India atanga Sikh ram lak hrana din duhtu pawl, Khalistan-a inhmang tak pakhat, American khua leh tui chu Delhi-in thah a tum niin a lo puh tawh a ni.
Sorkar thupuangtu chuan US hian ‘thil ni thei awm ang zawng zawng chhui chiangin a mawhphurtu chunga chet lak ve ngei a tum’ tih a sawi bawk.
India-a foreign ministry erawh chuan US puhna hi a pha thung a. High-level inquiry committee dinin ‘inpuhna hi chhui tur leh an thil hmuhte pawh US himna atan a derthawn phah em tih hrilh’ an tum tih a sawi bawk.
Ningani khan Pentagon chuan India hnena drone leitir tur hi ‘foreign policy a neih mek zinga mi a nih bakah US-India inkawmngeihna tihnngheha US himna vawnhimna tur’ a nih thu a sawi a ni.