Pathianni zana inkhel ngaihven hlawh takah Arsenal chuan Premier League hmahruaitu Liverpool chu 3-1 in an hneh a, point thumin an inkar an tizim. Liverpool lakah an chak vangin Arsenal in champion beiseina thar an nei a, EPL-ah champion tuma inelna boruak a nung thar leh zual bawk.
Champion beiseina thar nei tura chak mamawh Arsenal hian Emirates Stadium-a an mikhual lakah bul an tan tha a, goal pawh an thun har lo. Inkhel tan atanga minute 14-na lekah Gunners hian fuh zetin an mikhualte an nawr tlang. German forward Kai Havertz chuan goal thun theihna hun tha tak a nei a, a ball pet na tak chu Reds si nghak Alison Becker-a’n a dansak. Alison hian dang tha viau mah se duh thusamin a thianfai thei bik lo va, a ball dan per hi Bukayo Saka hmaah a tla a, England forward Saka hian goal ruakah awlsam zetin a pet goal a, hmahruaina goal a thun.
Khingpui hautak Liverpool lakah goal thun hmasa zawk an nih vangin Gunners an phur a, an mualah an khel tha chhunzawm viau. Goal thun tumin hlauhawm siam thin mah se chawlhlawk hmain goal dang an thun belh thei lova, vanduaithlak takin goal an chhuah ta zawk. First half tawp dawn tepah Liverpool hian fuh takin an nawr tlang a, hlauhawm an siam. Box chhunga Arsenal defender ten ball chang bawk mah se an thianfai thei lova, defender Gabriel chuan minute 45+3-ah vanduaithlak takin an lamah a ti-goal a, Liverpool si phurh a sut sak.
Chawlhlawk hmaa chungnung zawk awm thei lovin chawlhlawk hnu lamah inkhel a tihmuhnawm zual. Goal thun tuma an innawr tawn karah Arsenal an vannei a, vanneih goal a chhal ngam goal hnih an thun. Gunners hian counter attack chhawr tangkaiin an khingpuite an nawr let thut. Arsenal forward Grabiel Martinelli leh Liverpool defender Virgil van Dijk ten ball an umfal a. Ball chan tumin Red si nghak Alison a lo tlanchhuak ve bawk. Liverpool player langsar pahnihte hi an inringthul a, beisei lawk loh takin Martinelli hmaah tak ball a tla. Brazil forward Martinelli hian goal ruakah awlsam takin a pet goal a, minute 67-naah hma an hruai nawn lehna goal a thun.
Arsenal in hma an hruai nawn leh hnuin inkhel a hmuhnawm zual sauh a, goal thun tuma tan khawh Liverpool che vel a hmuhnawm thei hle a, Arsenal si nghak David Raya an tihthaih fo. Goal thun tuma thapui an thawh laiin minute 88-naah defender Konate hnawhchhuah a ni a, hei hian Liverpool ke a phet a, an tan chet a har leh zual phah.
Tam zawk an nih hnu lawkah Arsenal in hun tha an nei zui a, Laipui a puak nawn leh. Defender Kiwior hnen atanga ball a hmuh chu Leandro Trossard chuan tha zetin a khalh tlang. Ball a khalh fal hnuin Trossard hian si nghak Alison kapkar-ah fuh zetin a pet goal a, minute 90+2-ah an goal thumna thunin, an hmahruaina a tizau. Arsenal an hmachhawn hi si nghak tha ber pawl, si nghak zinga ball thiam ber pawla hriat ni bawk Alison Becker tan hun tha lo tak a ni a. A chetsual vangin goal hnih an chhuah a tih theih. Trossard goal thun hnuin goal dang a nluh belh thei tawh lo. Arsenal chuan an mualah hnehna pawimawh tak an chang a, hmahruaitu Liverpool nen an inkar an tizim.
Arsenal hian vawi 23 khel tawhin point 49 an hmu a, hmahruaitu Liverpool nen an inkarah point hnih chiah a tla zep tawh. Emirates Stadium-ah Liverpool an tlawm vangin EPL champion nih tuma inelna a nung thar leh zual. Arsenal in champion beina sang zawk an neih thar rualin pathumnaa awm mek Manchester City tan pawh champion theihna kawng zau zawkin a inhawn. City hian Liverpool leh Arsenal te aia vawi hniha khel tlem zawk chungin point 46 an hmu mek a. An khelh tlemna pahnihah an chak ve ve a nih chuan hmahruaitu an ni daih thei dawn. City hian nizan khan Brentford an hmachhawn a. Gtech Community Stadium-ah point thum an hmu a nih chuan Arsenal lehpelin pahnihnaah an kir ang.