Premier League club lian Manchester United chu Pathianni zan khan Old Trafford-ah an vul a, an mikhual West Ham United chu si thum faiin an sawp. An mualah an chak vangin Red Devils hi paruknaah an inhlangkai a, top 4 huang an hnaih hret hret.
Season kal meka khel tha tluang hleithei lo United hian an mualah chak ngei tumin tan an khawh a, khelh pawh an khel tha viau. Khel tha viau mah se goal chhuah hmasa zawkah an tang teuh hle thung. Inkhel tan tirhteah Hammers hian corner atangin goal an thun teuh hle a, si nghak Andre Onana-a’n a chhan him hlauh. An him hlauh hnuin an hlauhawm zui a, goal pawh an thun har lo. Forward thahrui ngah Rasmus Højlund chuan inringtawk taka a khalh tlang hnuin tha zetin a pet goal a, minute 23-naah hmahruaina goal a thun.
United hmahruaina goal thuntu Rasmus Hojlund khan United tan inelna hrang hrang a hmachhawn hnuhnung vawi rukah goal 5 a thun a. EPL a khelh hnuhnung vawi li-ah goal thun vekin, United player awm tawh zawng zawng zingah a zawna match li goal thun zawn thei naupang ber record a siam a. Club lianah hnuhma tha a hnutchhiah. Kum 21 mi Hojlund hian ball a thiam a, a pumrua a lianin thahrui a nghal tel bawk a, bakah team liana khel a nih bawk vangin goal tam zawk thun theihna hun tha a nei a. EPL-ah a hming a chher len theih viau a rinawm.
Rasmus Hojlund goal thun hmanga hmahruai chunga chawlhlawk hmang United hian chawlhlawk hnu lamah an khel tha chhunzawm a, goal hnih an thun belh leh. Chawlhlawk hnu lamah hi Argentina rawlthar Alejandro Garnacho chanpual a ni a, Red Devils goal hnuhnung pahnih hi a thun a ni. Garnacho hian Bruno Fernandes siamsiam atangin minute 49-naah an goal hnihna a thun a. Hun tawp dawn hnaih minute 84-naah Scott McTominay siamsak atangin an goal thumna a thun zui leh bawk.
Si thum faia West Ham United sawptu Manchester United hian vawi 23 khelin point 38 an hmu a, paruknaah an awm mek. Pathianni zana hnehna an chan hmangin pen khatin hma an sawn hret a, Europa Conference League khel thei dinhmunah an ding thar. An champion zo em lo a nih pawhin top 4 huangah awm a, Champions League khelh phak ngei an tum dawn a. An tum ram thleng turin khelh that tluan an mamawh. Champions league an khel phak lo a nih chuan United thuneituten manager Erik ten Hag an ban tawh ngei a rinawm.
Si thum faia Hammers an sawp tum hian United defender pawimawh West Ham lakah hnehna lian an chan tum hian United defender pawimawh Lisandro Martinez chuan a khupah hliam a tuar. Martinez hian inhliam hian United ngaih a titha lova, Argentine defender hi engtia rei nge a chawlh ngai dawn tih hriat a la ni rih lo.
Pathianni zana inkhel dangah table hnuai lama awm Nottingham Forrest chuan AFC Bournemouth lakah tlawm an pumpelh a, point khat an hmu. Bournemouth tan hian Justin Kluivert chuan minute ngana lekah hmahruaina goal a thun a. Kluivert goal thun hi Forrest tan Callum Hudson-Odoi chuan minute 45-naah a sut a, hun tawp thlengin goal dang a luh belh tawh lo.