Jammu & Kashmir, Srinagar dai ram hnuaia nimin tuka inkahna thlengah firfiak pawla mi 2 kah hlum an ni a, CRPF sipai a thi ve bawk.
Firfiakte hi motorcycle-a inphur niin CRPF patrol party an kap a, an zinga pakhat an kap hlum a. CRPF hian chhang let nghalin an pahnih hian an kap hlum ve nghal a ni.
Ravi Deep Shahi, IG CRPF, Srinagar circle chuan, “CRPF hi beih an nih veleh rang tangin an chhang let nghal a, helte hi an kap hlum nghal ve ve a ni,” tiin a sawi.
Inbeihna thlenna hmunah hian hotu lian zawkte pawh an thleng nghal a, thil tha lo thleng zel thei a awm hlauhthawn thu-ah sipai dang dah belh nghal an ni bawk.
Firfiak kah hlum takte hi tute nge an nih hriat a la nih loh thu CRPF chuan an sawi a. An thian dangte pawh an awm hnaih an rin avangin an dap zui mek bawk.
Nimin tuka inbeihna thleng hi chawlhkar khat chhunga inbeihna a thlen vawi hnihna a ni a. January 31 khan Pakistani firfiak mi 3 chu Srinagar-Jammu national highway, J&K-a Bann Toll Plaza-ah police team-in an chuanna lirthei an lo endiknaah an inkap a, an vai hian kah hlum an ni.
Thla hmasa khan Jammu & Kashmir police hian Jaish-e-Mohammed firfiak pawla an mi langsar tak tak mi 5 chu Srinagar-ah an lo man tawh bawk a, heng mite hi grenade hmanga venhim hna thawktute bei thin an ni.