- Dr. C. Lalrampana
A KAMKÊUNA
Kawngpuia lirthei tlan dan himna [Road traffic safety] tih hian kawngpui hmangtute thihna emaw, hliam na tak tuar emaw venna atana hmanrua leh hmalaknate a kâwk a ni. Kawngpui hmang tlangpuitute chu kea kalte, thirsakawr [cycle] khalhtute, lirthei khalhtute, lirtheia chuangte, leh kawngpuia vantlang lirthei bus leh tram-a chuangte an ni. Traffic safety hi kum 75 chuang zet science anga zirchian a ni tawh a. World Health Organization (WHO) report-in a tarlan danin, kum 2010 leh 2021 inkar khan khawvel pumah kum tin thi zat chu 5% zetin a tlahniam a, kum tin mi maktaduai 1.19 velin an thihpui a, UN member ram 108-in a tlahniam tih an sawi. India ramah erawh chuan thihna hi 15% zetin a pung thung. Hei vang hian tun feb, 2024 thla chhung kawngpui himna thla hman mek thupui atan pawh “I him theih nan traffic Rules te zawm thin ang che” tih hman a ni.
UN GLOBAL ROAD SAFETY WEEK
United Nations-in khawvel huapa Road Safety Week a hman hmasak ber hi April 23-29, 2007 kha a ni a; hei hi Working Party on Road Traffic Safety (WP.1) of the United Nations Economic Commission for Europe (UNECE)-in March, 2005-a rawtna a siam dungzuia hman a ni. Heta chin tun thleng hian kumtin UN hian khawvel huapin Gobal Road Safety Week hi a hmang ziah thin a ni. Hetia lhawvel huapa lirthei khalhtute leh mipui kea kalte nunna chhanhim nana beihpui thlakna hapta hman a ngaihna chhan hi heng mihring thil siam lirthei chihrang hrangte hi mihring tan tangkai hle mah se, a hmangtute fimkhur tawk thin lohna avangin kumtina mihring nun tam tak suat thintu a nih vang a ni. Mihring thiamna hmanga hmanraaw hrang hrang leh technology changkãng tak tak hmanga thil siam tha tak takte hi kan fimkhurpui loha a hman dan kan thiam loh chuan kan tan thang leh fal, mangkhawng hlauhawm tak a ni thei tih a lang chiang hle. WHO-in March 2023-a data report a pek danin khawvelah kumtin lirtheia chetsuaalna avangin mi maktaduai 1.3-in nunna an chãn thin a; heng zinga a tam berte hi kum 30 hnuai lam vek an ni a; second 26 dan zela mi pakhat thi anga chhut theih khawpin an thi tam tihna a ni.
NATIONAL ROAD SAFETY WEEK
Kum 1989 atang khan India ramah National Road Safety Week hmasa ber hi hman tan a ni a. Tichuan, Sundar Committee-in a rawn angin March 15, 2010 khan Sorkar laipui chuan National Road Safety Policy (NRSP) a hmang tan bawk. Ministry of Road Transport & Highways, Government of India chuan ‘Swachhata Pakhwada’ hnuaiah Jan. 11-17, 2023 chhung khan National Road Safety Week a hmang a. Hemi hun chhung zawng hian India ram pum huapa state leh UT hrang hrangahte NGO leh zirlaite zingah lirthei khalh fimkhurna tura infuihna lam hawi Essay, poster leh thuchah, hla chham mi leh malzai, drama nen kawng hrang hranga hma lain programme hlimawm tak tak, infuihna thu tha tak takte nen inzirtirna hun hman a ni. Kumina Road safety month thupui chu – “I him theih nan traffic Rules-te zawm thin ang che” tih a ni. Kum 2022 chhung khan India ramah lirthei chetsualna avanga thi zat chu mi nuai 1.68 aia tam a ni a; nitin mi 462 emaw, minute 3 dan zelah mi pakhat thi ang zela chhut a ni.
ZORAMAH ROAD SAFETY MONTH
Mizoramah State Sorkar chuan kum tin Road Safety Week hi a hmang thin a. Kuminah phei chuan thla khat chhung tawp lirthei chetsualna laka himna kan neih theih nan Road Safety month a hmang mek tih kan hria a. Kum 2022 chhung khan Mizoramah vawi 133 accident a thleng a; thi zinga 57-te chu tlan chak luat vang a ni a, 13-te chu rui chunga lirthei khalh vanga thi an ni. Kawngpuite hi a chhiat chuan chetsual a tam phah thei a; chutih rualin kawngpui, ngil tha leh mam tha, rulnganpa ang Zara dum zùn pawh hi lirthei khalh puat puat chingho tan chuan chetsualna thlentu a ni thei bawk. Chuvangin, Road accident a lo tlem zawk thheih nan heng a hnuuaia mite hi uluk taka ngaihtuahin vawng theuh ila a taka zawm ngei tum bawk ila a tha hle ang:
Traffic Rules: MVI leh Traffic Police duty-te ngai pawimawhin Traffic Rules leh MV Act chihrang hrangte ngai pawimawhin zawm theuh ila, tute tan pawh himna a ni.
Helmet: Ke hnih nei khalhtute’n dan ang thlapa khum theih chin ngei lukhum himdam leh khauh tha khum thin ila; hmanhmawh avang emaw, kan kalna tur a hnaih vang emaw, Traffic duty hmuh phak loh a nih vang emawa lukhum khum loh mai mai ching lovin lukhum ngai pawhmawh theuh ila chetsual palhah pawh a him ber. Zin kawng leh khawpuiah a hun leh hun lo pawh thlu lova over take phet tum thinte hi sim ila chetsual laka himna bulpui pawimawh tak a ni tih hria ila.
Seat Belt: Khawchhakho tihdan kan lãk kai chak tehlul nen Seat Belt hren erawh kan lakai mawh hle. Lirthei khalhtu leh mi chuangte tupawh mai hian Seat Belt hi hreng thlap vek zel ila chetsual palh thulhah pawh thihna pumpelhna tha tak a ni. Sorkar hian Seat Belt hren hi uluk takin compulsory-in kalpui se chetsual thulha mihring nunna himna pawimawh rak a ni. India ram state dangah pawh khauh taka kalpui a ni. Mizoram a nih avangin ngatinge kan kalpui ve loh lêm ang le?
Ruih theih thil: Lirthei chihrang rhrang khalhtute’n zu leh damdawi ruihlo, thluak leh ngaihtuahna tibuai thei ti/rui chungin lirthei khalh lo ila, chetsualna lakah a him ber. Thluak fim lova lirthei khalh hmuh tur an la awm nual, sorkar hian uluk zawkin vil zui zel se a duhawm hle.
Chak lutuk lovin: Mizoram speed limit 35-40kms. ph. a ni tih kan hria. Aizawl khawpui kan chhuahsana hmun hla zawk kan tlanin mahni kan inthunun zo lo fo va, chak tak taka tlan kan chin thin avngin chetsualna a tam phah a, a him lo hle. Chuvangin, a theih chhung chu kan ram speed milin tlan thin ila a him ber thin.
Hawihhãwmna: Lirthei khalhtute zingah mihring kea kalte ngaihchan nachang hre tawk lo an la tam hle. Zebra cross zawnah kawngpui kãn tuma kea kalte an din tawh chuan traffic duty signal kher nghak lovin hawihhãwm takin ding la kawngpui kãntir thin ila him tlãnna a ni. Kawngpui kãn laklawh lai an nih phei chuan tur hmanhmawh ching lo ila, intihpalh a awm lo ber.
Kum tling lo: Kum tling lo leh Driving license nei lote lirthei khalhtir lo ngam ila chetsual pumpelhna tha tak a ni. Kum tling lo lirthei khalh an la tam hle, abikin ke 2 nei khalhtute zingah a tam lehzual.
A TLÃNGKAWMNA
Kawngpuia lirthei tlan dan himna thla (Road teaffic safety month) chungchangah sawi tur tul leh pawimawh a va tam tehlul em! sawi vek sen a ni lo. Hemi chungchangah hian awareness, workshop, programme hrang hrang pawh kan huaihawt tam tawh narawh e; tunhma ai chuan kan changkãng tawhin kan hawihhãwm tawh hle bawk. Chutih rualin lirthei khalhtute zingah mãwl zual deuh leh caliber hniam zual, thinram (temper) sang zual an la awm nual niin a lang. Abikin mahni lirthei khalha veivakho zingah invaupum ching leh public carrier-ho laka inchhekarbãwm ching an la awm nual nia sawi a awm fo thin. Hetih lai kara ZDU-te’n taima taka Road Safety Week an han hmang kumtin thei thin hi chu an fakawm takzet a ni. Fak hlawh ngai lo valrual ZDU-te hian fak an phu hle mai! chuvangin, mipuite pawh hian Sorkar leh ZDU kutah ringawt nghat lovin he Road Safety Month kan hman mek hi hmasawn nan leh him nan hman tum theuh ang u.