ZPM Consultant F Rodingliana, Minister chuan power-ah Mizoram a intodelh theihna turin kalphung tha zawk an zir zel a, kum nga chhungin kawlphethaa intodelh an tum tih a sawi.
Nimina ZPM party-in an pisaa chhung inkhawm an neihah thu sawiin P&E Minister F Rodingliana chuan, kawlphethaah Mizoram a intodelh theih nan sorkar laipui mai an dawn lo va, foreign thlenga dawrin hma an la mek tih sawiin, “Policy mila budget kan siam atangin hmasawnna bung thar kan kai dawn a. Kum nga chhungin power-ah intodelh kan tum dawn,” a ti.
F Rodingliana chuan kum nga chhungin power-ah intodelh tura hmalak an tumna kawngah company leh ram hrang hrangte dawrin hma an la mek a. Chutih mek laiin, thenkhat chuan kum 10 chhunga an tih theih loh thla 2/1 chhunga ti mai turin an beiseina tawngkam ni awm takte an hre thin mah se, hma an la zel dawn tih sawiin, “ZPM hi eng sorkar nge tih Zoram mipuite hian an la hre dawn,” a ti.
Power-a intodelh theihnan hydel project bakah ni zung chakna hman tangkai lehzual an tum tih sawiin F Rodingliana chuan, “Rooftop leh solar plant liante siam tura hmalak mek a ni. Hemi atan hian power khawlna tur power store bank siam tur leh ni zung chakna bakah hydrogen leh ethanol hmanga power plant siam tura kawng dap mek a ni,” tiin, Mizoram khaw hrang hrangten solar plant siamna tura ram an pek chu duhkhawp a la nih loh thu a sawi.
Capacity sang zawk hmang thei tura hma an lak mekah, an peih fel hunah chuan he tranformer-in a chawm veng 40 chuang harsatna tawh thin chu kan sutkian theih an beisei tih sawiin, AMC area chhungah transformer thar 34, line thar hrang hrang leh bare conductor hrui dum, kilometre tam tak ruahman a nih thu P&E minister hian a sawi bawk.
Sorkarna an chan hnuah a department chan hrang hrangte kal dan an zir chiang a, thil tam tak a nih loh dan tura sorkar kal tawhten an lo kalpui chu mak a tih thu sawiin, F Rodingliana chuan, “Printing & stationary lamah pawh tan lain, tunah hian naupangten zirlai bu tha zawk leh a hun taka an zirlaibu an hmuh theih nan theih tawpin hma kan la a. Industry lamah pawh theih tawp kan chhuah zel dawn a, sorkar hmasain a taka hmalakna a lo neih mumal loh zia te kan hmu chho zel a, kan policy milin budget kan siam tawh dawn a ni,” a ti.
MSME lamah pawh staff tipung si lovin, mumal zawkin hma an la dawn tih sawiin, “Tun hnaia central lam kan dawrnaah mak tak maiin an lo inhawng em em mai a, kan chief minister chungah beiseina thar an nei a ni,” tia sawiin, a neitu rilru anga hna thawkin theih tawpin thalaite leh mipuite tana malsawmna hnar ni turin tlak huamin hma an lak zel dawn avangin, tawngtaipui turin mipuite a ngen a ni.