Maldives President Mohamed Muizzu chuan Thawhtannia an ram parliament thutkhawmah an rama Indian sipai awmte chu March 10 hma atangin an chhuak tan dawn niin a sawi.
Inthlan dawna a campaign lai khan sipaite chhuahtir hi a tiam a, Maldives mipuite zalenna leh mahni kea dinna chu vawn him a tiam.
A la awm bangte pawh thliarkar ram atang hian May 10 hmain an chhuak dawn a ti bawk.
Muizzu-a hian Maldives-a Indian sipai awmte chhuahtir hi a campaign auhla pakhat niin hei hian China leh New Delhi inkar boruak pawh a siam hat a ni.
President a nih tirha ram mipuite hmaa thu a sawinaah ‘Maldives-a ram dang sipai awmte an chhuah vek tur thu leh Maldives-in tuipui a hloh tawhte la letin kea mahnia Maldives a dinna tichhe thei inremna zawng zawng thiah vek’ a nih tur thu a sawi nghal.
Muizzu-a hian Maldives sipaiten Exclusive Economic Zone (EEZ) chu nileng zankhuain an veng tawh zawk dawn tih a sawi niin Sun Online chuan a tar lang.
A sorkar chuan Maldives mipuite thatna tur a ngaih pawimawh ber tur thu a sawi.
President thusawi hi MP 56 – Democrats 13 leh MDP atangin 44 chuan an boycott a, ‘mipui rorelna kalhmang lovin sorkar a kal’ niin an sawi.
Party pahnihte hian tun hnai khan president hi India do zawng hrim hrimin a che niin an sawi tawh.
Kar hmasaa New Delhi-a an inkawm hnu lawkah Maldives foreign ministry chuan ram pahnihte hian India-in a sipaite chu March 10, 2024 hmaa thlak kual turin an inrem tih a sawi.
India leh Maldives hi ram inkawmngeih tak an ni ngar ngar thin a, Muizzu-a’n thuneihna a chan atangin a dang ta thung.
Thla hmasa khan India leh Maldives inkar hi a sosang hman hle a, minister pakhatin Lakshadweep a tlawh tumin mawi lo takin Prime Minister Narendra Modi chungchang a sawi vang a ni.
India hian Maldives sorkar laka a lungawi loh thu pawh a sawi chhuak a. Milar tam takin X-ah tute mahin tlawh lo turin mi an sawm a, Maldives innghahna ber hi khualzinin an tlawh hi a ni.
Chawlhkar thum a boycott chhungin India hi Maldivian market-ah pathumna atangin panganaah a tla thla nghal a ni.
Thla hmasa khan Muizzu-a hian China tlawhin communist ram hnenah hian khualzin tam zawk tir turin a ngen a, hei pawh hi India-in a boycott a chhan letna ni ngeia ngaih a ni.