Nimin khan district hrang hrangah Kangmei Ven Hapta hman tan a ni a. Lunglei-ah chuan ‘Thapui thawhin kangmei ch- huak tur i veng ang u’ tih thupuia hmangin, Kangmei Ven Hapta hi an hmang tan a, Convention Hall-ah HPC Vice Chairman V. Malsawmtluanga’n a hawng.
HPC Vice Chairman chuan kangmei chhuak chu mihring tihchhuah deuh vek nia sawiin, mitin fim- khur turin a chah a. “Tupawh India khua leh tui tawh phawt chuan khuanu kutchhuak ramngaw, lui, dil te leh nungchate humhalh hi kan tih ngei ngei tura India danpuiin min phut tlat a ni”, a ti.
Forest Survey of India-in a tarlan danin nikum chhung khan Lunglei district-ah kangmei hmun 212-ah chhuakin, ram Ha 44.87 a zau a tuam a. Hemi zinga hmun 183 (418Ha) chu bawlhhlawh leh lo hal te niin, a bak hmun 29 (27.29Ha) chu ramngaw kang a ni.
Lawngtlai ah chu- an Kangmei ven hapta chu LADC Chief Executive Member V Zirsanga’n a hawng a. Kolasib-ah pawh ni- min vek khan Kangmei Ven Hapta chu St Joseph’s Parish Hall-ah Kolasib bialtu MLA, Deputy Spea- ker Lalfamkima’n a hawng.
Kum 2021-2022 chhungin Kolasib District-ah ram hectare 112.50-a zau kangin, hectare 12.35 chu forest area a ni a; kum 2022-2023 chhungin hectare 102.26-a zau kangin, hectare 3 chu forest area a ni; Kum 2023-2024 chhungin hectare 87.02-a zau kangin, hectare 2.50 chu forest area a ni thung.
Mamit-ah chuan Chhimveng YMA H- all-ah Mamit SP Lal- thangpuii Pulamte-in Kangmei ven hapta a hawng a. Fimkhur ta- wk loh vangte, lo/ leipui hal vangte, dan leh thupek zawm loh vangtea ram a kang thin chu pawi a tih thu a sawi a. Ram kang chuan nghawng thalo tak tak a nei thin tih sawiin, mihring hris- elna thlenga nghawng pawi thei a nih avangin, sawrkar pawhin ramkang ven chu a ngaipawimawh hle tih a sawi.
Kangmei ven kaw- nga dan leh thupek awm te zawm theuha, ramkang veng tura theihtawpchhuaha tha thawh theuh turin Mamit SP chuan mipuite a sawm a ni.
Serchhip-ah pawh DC Conference Hall-ah Serchhip SP MS Dawngkima’n kangmei ven hapta a hawng a. Mizoram hmun hrang hrang dinhmun thlirin kangmei ven kawngah tanlak nasat a ngai tih sawiin, kangmei chi hnih – ram kang (forest fire) leh in kang (domestic fire) te chu ngaihpawimawh ve ve tul a nih thu a sawi.
Kangmei tichhuak lo tura mitin fimkhur tur a nih thu a sawi a. kangmei veng chu sawrkar leh tlawmngai pawl te chauh tih tura dah tur a nih loh thu leh mitin tih tur leh mawhphurhna a nih thu a sawi.
Serchhip district-a ram ngaw zau zawng 80.47% niin, heng zinga 16.8% chu ram ngaw chhah tha Very Dense Forest (VDF) a ni a. India ram pumah Mizoram chu ram zau zawnga tehin Forest Area nei zau ber niin ISFR 2021 record-a a lan danin 84.53% chu forest in a tuam a, VDF area erawh 0.74% chauh niin, India hmarchhaka VDF nei tlem ber a ni thung.
Champhai-ah chuan DIET Campus-ah Additional DC M. Misael-a’n kangmei ven hapta a hawng a. Mitin te kangmei tichhuak lo tura fimkhur tura chahin bungrua, fimkhur tawk loh leh inthlahdah avangin kangmei a chhuak fo nia sawiin, fimkhur a tul thu a sawi.
Nikumah Champhai district chhungah lo atan ram hmun 3394 (hectare 2019) vah a ni a, ram hmun sawmnga hectare 244 chuang a kangral. Ramkang kaihhnawihah FIR 6 thehluh a ni bawk.
Hnahthial-ah chuan Govt Hnahthial College Auditorium-ah Addl DC Lalvenhima hovin kangmei ven hapta an hawng a. Saitual-ah pawh DC Bangla tualah Addl DC Lallawmawma hovin kangmei ven hapta an hawng.
Khawzawl-ah pawh Addl DC Lalfakzuala hovin nimin vek khan kangmei ven hapta an hawng bawk a ni.