Aizawl : South Tuipui bialtu MLA Jeje Lalpekhlua’n nimin khan Hnahthial District-a Department hotute kawmin, pawimawh leh tul hrang hrang a sawipui.
Jeje Lalpekhlua chuan ramin hma a sawn theihna turin hmachhawp tam tak duan a nih thu sawiin, Hnahthial District chhunga Head of Office te chu District tana hmasawnna tluantling (Sustainable Development) thlen thei ngaihtuahpui turin a ngen.
Chief Minister-in a ngaihpawimawh em em, mahni bank account-a sawrkar sum dah chungchangah district head of office te chu fihlim turin a Jeje Lalpekhlua chuan a chah a. Hun vawn dik a pawimawh thu pawh sawiin, office kai hun leh ban hun sawrkarin a siam ngaipawimawha, biometric attendance kalpui ngai lo khawpa district rinawm leh rintlak ni tura tan la thar theuh turin a sawm.
District hmasawn leh entawntlak a nih theihna turin sawrkar lama a fawng vuantute an pawimawh tih sawiin, an hmazawn theuhah theihtawp chhuah se a duh thu bialtu MLA chuan a sawi a. Thawhhona a pawimawh hle tih sawiin, department hotute chu an hnuaia thawkte nen inngaihsaktawna, inngaipawimawh tawn tur leh inzahtawn taka hna thawkho thin turia a duh thu a sawi a, chu chuan hmasawnna a thlen ngei a rin thu a sawi.
South Tuipui bialtu MLA Jeje Lalpekhlua chuan kalkhawmte chu inthlahrung lova an mamawh apiang a hnena thlen thin turin a chah a, thil tha, hmasawnna thlen tur a nih chuan tlanchhe lova theihtawp a chhuah thin tur thu a sawi bawk.