Aizawl: Thawhtanni khan Mizo Hnam Run chhung inkhawmah MNF Vice President Lalthlengliana chuan enchhin tura intiam ZPM sorkar kal zel an thlir dawn tih a sawi.
MNF Vice President Lalthlengliana chuan, “Chak leh inringin kan bei a, kan tla ta si. Kumkhuain a tlin reng theih tlat loh a ni. Amaherawh chu, roreltute hi Pathian ruat an ni tih pawm ila, tuna roreltute pawh hi a ruatte an ni. ‘Min enchhin rawh u,’ tia intiam an ni a, engtin nge an kal zel kan thlir dawn a ni,” a ti.
ZPM chuan ram tana hnathawk tak tak chunga ro an rel a nih chuan tha a tih thu sawiin Lalthlengliana chuan, “Sorkar hmasain thil tha an tih chu chhunzawm zel se ka duh a ni. Tuna sorkar hi mipui hmaa an intiamna angin an thawk zel em tih kan thlir reng dawn a ni,” tiin, hna an thawk tha lo a nih chuan an dim dawn loh thu a sawi.
MNF vice president chuan an party-in inthlan a hmachhawn tam tawh a, tlak chang a nei angin tlin chang pawh a awm thin. Tunah eptu lamah thu mah se, nakinah an thochhuak leh dawn tih sawiin, “Taima taka beituten a tawpah thawhrim rah an seng thin,” tiin, taima taka ‘Pathian leh kan Ram Tan’ tia bei zel turin party mipuite a chah.