Aizawl: Kawnpui Banglaveng-a hmeichhe naupang kum sarih mi, Ruthi Lalpekhlui chu uiin a seh avanga hliam na tak tuarin ZMC Falkawn-ah enkawl mek a ni a; hetiang thil a thlen avang hian Kawnpui III VCP chuan a rang lama ui vulhtute kokhawm an tum.
Thudawn danin, Inrinni zing, tukthuan eikham khan an thenawmah hmeichhe naupang hi a leng a, ui hi a chul vel a; a te ri an hriat hnua an han en chuan ui hian a lo seh tih hriat niin, ui hian a hmaiah sehin, a biang tawn tawn bakah a hmuiah hliam na tak a tuar a ni.
Kawnpui damdawi in panpui nghal a ni a; amaherawhchu, doctor a awm loh avangin nachhawkna pek a nih hnuah District Hospital, Kolasib lam panpui lehnghal a ni a; Kolasib-ah hian a hliam thuina tur duh ang a awm loh avangin ZMC hi an panpui leh ta zawk a, Inrinni zan khan a hliamte hi thuisak a ni.
Ruthi Lalpekhlui hi Govt Primary School V-a Pawl 1 zirlai niin, a hliam tuar avang hian thil tuiril bak engmah a la ei thei lo va; ui neitute hian Inrinni khan ui pawh hi an tihlum ve nghal a, naupang pawh a theih ang angin a inenkawlnaah hian an ngaihven mek bawk.
He thil thleng chungchangah hian naupang awmna village council president chuan ui vulhtute an fimkhur lehzual theihna turin kohkhawm tum an ni tih a sawi a; ui neitute leh vanduaina tawkte hi inthenawm mai a nih avangin thubuai an thehlut dawn em tih erawh a hriatpui lo tih a sawi.