Khawvela ennawm ropui ber ‘The Greatest Show on Earth’ an tih mai chu kum 2026 ah khelh a ni leh dawn a. World Cup chanchina a vawi khat nan ram 48 in inelna an hmachhawn dawn. World Cup 2026 hi ram pathum; USA, Mexico leh Canada ten an inthlen tawm dawn.
Khawvela football thuneitu sang ber FIFA chuan World Cup 2026 Opening match leh Final khelhna tur an tichiang a. New York khawpuia MetLife Stadium-ah final khelh a ni ang a. Opening match hi Azteca Stadium, Mexico-ah khelh a ni thung ang.
World Cup 2026 hawnna tur Azteca Stadium hi stadium lar a ni a. World Cup 1986 quarter-final-ah Argentina in 2-1 England an hnehna khelmual kha a ni a. Khami tuma lar em em chu Maradona goal hmasa zawk ‘Hand of God’ a ni. England laka Maradona ‘Hand of god’ kha goal tenawm ber ang hiala ngaih a ni a. A goal hnihna erawh goal ropui bera ngaih a ni ve leh thung. Azteca Stadium-ah hian mipui 83,000 zet an leng a, WC 2026 hawn hunah thawm a tha tham viau turah ngai phawt ang.
World Cup 2026 final khelhna tur MetLife Stadium hi American football team New York Giants leh New York Jets te khelmual intawm a ni a. Mipui 82,500 an leng a, World Cup 1994 kha khe khelmualah hian khelh a lo ni tawh bawk.
Tarlan tawh angin WC 2026 hi ram pathum; USA, Mexico leh Canada ten an inthlen tawm dawn. Mexico hian World Cup vawi hnih 1970 leh 1986-ah a lo thleng tawh a, 2026 hi a vawi thum thlenna tur a ni a. USA hian kum 1994 khan lo thleng tawh in, Canada hian an vawi khat thlena tur a ni ve thung.