AIFF Youth League khelh mekah Aizawl FC Under 17 chuan an tlawm hnuin hnehna an chang leh ta a, thawhlehnia an khingpui Harisinga Town Club chu 4-0 in an hneh. AFC U 17 team hian Group C ah hma an hruai chhunzawm zel.
Thawhlehni khan Group C hmahruaitu Aizawl FC U-17 chuan Youth League Round 2 match an khelh hmasak berah round 1-a an lo hneh tawh Harisinga Town Club an hmachhawn a, hnehna an chang nawn leh.
Chak ngei tuma inlan AFC U U-17 tan hian Lalthanpuia chuan Pazawna corner pet tha tak chu mawi takin a tauh goal a, minute 29-naah hmahruaina goal a thun. Thanpuia goal thun hnu hian chawlhlawk dawn hnaih minute 45-naah H. Lalruatfela chuan box pawn atangin tawih zetin a pet goal a, an hmahruaina a tizau a. Si hnih faia hmahruai chungin chawlhlawk an hmang.
Chawlhlawk hnu lamah AFC an khel tha chhunzawm a, goal hnih an thun belh leh. An khingpuite ngam tak AFC tan hian PC Pazawna ball pek tha tak atangin Rothangpuia chuan minute 75-naah an goal thumna a thun a, an chakna a nem nghet. Si thum faia hmahruai tawh Aizawl FC in an duhtawk mai lo. Minute 88-naah PC Lalmuanawm chuan an goal lina a thun zui leh a, a tawp a khar.
Harisinga Town Club sawptu Aizawl FC hian Group C North East Zone ah hma an hruai chhunzawm zel. February 10, 2024 inrinni chawhma dar 11:00 khian MFA Ground-ah Football 4 Change Academy an hmachhawn zui leh ang.