Mizoram sorkara Power & Electricity department chuan kum 2024-25 chhunga kawlphetha hman man tur rawtna, Mizoram leh Manipur enkawltu, Joint Electricity Regulatory Commission (JERC) hnenah a theh lut a, êng chhit man hi tisang loa a ngai hman an rawt.
JERC hotute hnen atanga thudawn danin, P&E department chuan January 17, 2024 khan kum 2024-2025 chhunga power enkawl nana sum an mamawh, Aggregate Revenue Requirement (ARR) leh tariff thar bituksak turin commission-ah petition an theh lut a, an rawtna thlen ang chuan tuna êng chhit man (power tariff) hman lai hi sorkar kum tharah pawh hman nawn leh an dil a, kawlphetha hman man hi tihsan rawtna a tel lo a ni.
Hemi chungchanga zawhna chhangin Power Minister F. Rodingliana chuan kum thum chhung electric bill chungchang an lo zir tawh thu te, sorkarna an chan chhungin electric bill chu tihpun loh an tum thu a sawi a, sorkar kum thara hman tur êng chhit man rawtna an thlenah pawh kawlphetha chhit man tihsan rawtna an thlen loh thu a sawi.
P&E minister chuan kawlphethaa intodelh turin kawng hrang hrangin hma an la a, solar plant lian siam tura hmalak mek a nih thu saiwin, hydel project hluihlawn tawhte chu thuam thar turin hma an la mek a, budget tharah pawh kawlphetha intodelhna tura hmalakna atan cheng vaibelchhe za tel an dah dawn tih a sawi bawk a ni.
JERC chuan power department-in kawlphetha enkawl nana sum leh pai an mamawh tur leh sum an hmuh chhuah zat turte a zirchiang ang a, hemi hnuah hian tariff subsidy a pek tur zat a bituk felsak dawn a ni.