Chawlhkar liam ta khan Europe khawmuala league lian zual panga (European top 5 leagues) ten season kal mek 2023-24 an khelh chhunzawm hlawm. Kar tawp inkhelah hnuhma thar, chanhin ngaihnawm tak tak a awm a, tun tumah hian kar tawp football hnuhma langsar zual kan tarlang ang.
- English Premier League
Pathianni zan khan London club lian Chelsea chu Stamford Bridge-a an mikhual Wolves lakah 4-2 in an tlawm. Wolves lakah 4-2-a an tlawm hma lawk hian Liverpool lakah 4-1 in an lo tlawm tawh bawk a, an khelh hnuhnung pahnihah goal li an chhuah zawn. Chelsea in goal li chin an chhuah zawn hnuhnung ber chu December 1989 daih tawh kha a ni a. Kum 34 zet hnuah goal li an chhuah zawn hmasak ber tum niin hnuhma tha lo tak an hnutchhiah.
An squad thuam chak nana sum seng hnem Chelsea hian an manager Mauricio Pochettino ban an chak viau tawh. Pochettino an ban a nih chuan zangnadawmnaah insen leh nual an ngai dawn a. An sum lak luh aia hman chhuah a tam zawk dawn vangin an manager hi an ban ngam mai rih lo.
Pathianni zan khan Manchester United chuan Old Trafford-a an mikhual West Ham United chu 3-0 in an hneh. West Ham lakah hian kum 21 mi Rasmus Hojlund chuan hmahruaina goal a thun. Denmark forward Houjland hian EPL a khelh hnuhnung paliah goal a thun zawn a. United tan EPL khelh lia goal thun zawn thei naupang ber a ni.
Pathianni zanah Arsenal in 3-1 a Liverpool an hneh tumin England winger Bukayo Saka chuan goal hmahruai a thun. Saka hian season kal meka inelna hrang hrangah goal 10 a thun a, assist vawi 10 a nei tawh bawk. European top 5 league player zingah season kal meka goal 10 chin thun a, assist vawi 10 chin nei thei pahnihna a ni a, Liverpool forward Darwin Nunez a nih rual.
Aston Villa player pawimawh Ollie Watkins chuan EPL season kal mekah goal 11 a thun a, assist vawi 10 a nei tawh bawk. EPL season kal mekah goal thun leh assist neih lama double figure nei thei awmchhun a ni a. Dwight Yorke (1995-96) hnu lamah Aston Villa player zinga hetiang ti leh thei hmasa ber a ni bawk.
Tottenham forward Richarlison chuan Premier League season kal mekah goal 10 a thun tawh a. Goal 10 a thunte hi ke vei lamin goal 4, ke ding lamin vawi 3 leh lu hmanga a thun vawi 3 te an ni.
- Spanish La Liga
Inrinni zanah 3-1 Alaves an hneh tumin Barcelona midfielder Ilkay Gundogan chuan assist a nei a, season kal mekah assist vawi kua a nei tling tawh. Hei hi Europe top five leagues season khatah assist a ngah ber tum a ni.
Alaves an hneh tum hian Barcelona rawlthar Vitor Roque (kum 18 leh ni 340-a upa) chuan goal a thun a, hnawhchhuah a tawk bawk. Kum zaibi 21-aah La Liga-a goal thun a, hnawhchhuah tawk bawk zinga naupang ber dawttu a ni a. A chunga awm chu Fernando Torres in September 2002 (kum 18 leh ni 179 a upa) a ni.
- Italian Serie A
Kum thar 2024-ah Inter Milan an chetha chhunzawm zel a, vawi ruk ngawt an chak tawh. Kum thar tirah vawi ruk an chak zawk vawi thumna a ni a. Kum 2007 leh 1943 kum thar tira vawi ruk an chak zawn tawh record an tluk.
- German Bundesliga
German Bundesliga-ah champion lai Bayern Munich an chetha chho zel a. Bayern tan hian an forward thar Harry Kane a chetha chhunzawm zel bawk. Kane hian a club thar tan goal 24 zet a thun tawh a, Bayern Munich tan an season hmasa bera goal thun hnem ber Lucatoni (2007-08) record a nih rual a. Record thar siam theihna hun tha tak a nei mek.
Bayer Leverkusen attacking midfielder Florian Wirtz chuan season kal meka inelna hrang hrangah assist vawi 13 a nei tawh a. Season kal mek Europe top 5 leagues-ah asssit ngah ber a ni mek.
- French Ligue 1
Inrinni zanah 2-1 a Strasbourg an hneh tumin PSG forward Kylian Mbappe chuan goal khat a thun a. Mbappe hian League 1 season kal mekah goal 20 a thun tling der tawh.