Thawhtan zana English Premier League inkhel awmchhunah champion lai Manchester City in Brentford an lehthal a, point thum an hmu. Phil Foden hattrick hmanga hnehna chang City hian Arsenal an lehpel a, pahnihnaah an luah let leh.
Champion lai ni chunga pathumnaa awm mek Manchester City hi 15-naa awm mek Brentford hmachhawn turin Gtech Community Stadium-ah an leng lut a. Pahnihna luah let leh a, Arsenal an lehpelh bakah hmahruaitu Liverpool hnaih leh zual turin mikhual an nihna mualah chak ngei ngei an mamawh. Chak an mamawhna inkhelah si an phur hmasa teh tlat. Si phur hmasa chungin champion zia an lantir a, Phil Foden hattrick siam hmangin hnehna an chang let a, point thum hlu tak an hmu.
Table hnuai lama awm mek Brentford hian champion lai lakah beisei phak bakin an khel tha a, goal an thun hmasa. Minute 21-na lenah Flekken siamsak atangin Neal Maupay chuan hmahruaina goal a thun. Maupay goal hian Sapui muthlu a kaiharh a, goal thum ngawtin an chhang let zui ta hial.Beisei anga goal an thun mai theih loh hnuin City hian chawlhlawk dawn hnaihah goal an thun ta nge nge. England forward Phil Foden chuan Brentford tlarhnungte thenfai theih loh chu a awma a dawn hmasak zet hnuin lei hrulah a hlap lut a, an si phurh sutna goal a thun a. Foden goal thun vang hian 1-1 a inhnehtawk chungin chawlhlawk an hmang zui ta a ni.
Chawlhlawk hnu lamah City an khel tha lehzual a, goal an thun belh thuai, Minute 53-na lekah Kevin de Bruyne ball pek tha zet mai chu box chhungah vengtu nei lova awm Foden chuan mawi zetin a tauh pial lut a, hma an hruai letna goal a thun. Hma an hruai let hnuin Pep Guardiola team in an khingpuite an nawr zui viau a, minute 70-naah an goal thumna an thun belh leh. Minute 70-naah hian Haaland hnen atanga ball a dawn chu Foden chuan mawi takin a khalh tlang a, an goal thumna thunin hattrick a siam a, an team a chakpui a, City hian Arsenal lehpelin pahnihna an luah let leh nghal.