- Mahmuaka Chhakchhuak
Pu Mawia tia kan han lam rik hi khawzawl kawnzar venga vawiin thlenga la awm Pu J. Lalmawia Sailo hi a ni. Anni chhungkua hi kan naupan lai zawng zawng min hrechiangtu tur tak pawh an ni a, keini naupang rual chunga an chhungkaw fel leh that thin zia kha sawi tur tam tak a awm bawk.
Kum 6 – 10 chho vel kan nih lai khan kawnzar vengah chuan TV nei awmchhun an ni loh pawhin TV-a VCR player hmanga Video chhuah thin awmchhun chu an ni ngei ang. Khang hunlai khan TV nei hrim hrim pawh an la awm meuh lo a, anni kha kamding an ni bawk a, Jeep an nei bawkin kan vengah chuan ‘Mi hausa chhungkua’ tia sawi thin an ni. Zanah hian film chi hrang hrang an chhuah thin a, a en turin thingfak pathum a ngai an tih loh leh pawisa cheng hnih a ngai an ti thin a, cheng ngain mi pathum an remtih chang pawh a awm bawk thin. Chutiang reng renga an Ina film hmuhnawm tak tak kan en thin lai chuan pawisa kan nei thei ngai si lo nen chhungte’n thingfak min kenchhuah tir remti bawk si lo nen chuan an Inhnuaiah bawkvak lutin chhuat awng atangin film kan thlir ru thin a. TV hma, rem taka en theihna tur laiah hian chhuat awng lian deuh bik hi a awmin anni chhungkua phei chuan bawlhhlawh phiah thlakna atan ber an hmang bawk thin a, chu kua chu chan a har thin hle a, keini aia u deuh zawkte chanvo a ni fo thin.
Tumkhat chu kan unau leh Marova te unau hian film en turin kan kal ho a, kan zavaia pawisa neih thawhkhawm chu cheng sawm a ni. Nimahsela mi paruk kan ni bawk si a, tumah inthlauhthlak kan duh bawk si lo chuan kan inpaw hlawm ta a, Abuangi chuan a nau Lungawii a pua a, Mami’n Masangtea a paw bawk a, Marova leh kei chu min kai ve ve bawk a, kan lut thei ta a nih kha. Pu Mawia te chhuatah chuan naupang kan thu khat hmur thin a, an chhuat hi a zau hrim hrim a, mi sawmthum kan thu leng hialin ka ring. Nimahsela sawi tawh angin pawisa leh thingfakte kan neih reng theih bik loh avangin a tam zawkah chuan an inhnuai chu kan hmun pawimawh tak a ni fo a, a remhre deuhin buara ip an kengin chumi rinchhan chuan mu chungin rem takin an thlir ru thin a, keini a nachang hre ve lo tan chuan vaivut pawh hruihin inah kan haw fo a, nu leh pate hauh kan tawk leh ziah thin bawk a.
Ka la hriatreng chu Pu Mawiate inhnuaiah hian meizial bung kan chhar fo bawk a, meizial zuk ruk kan chin tanna pawh a ni hial awm e. Nawalh hi a zen tereuhte kan sik thla a, a zen kan sihthlak hi a te thin khawp mai a, a bawm pangngai atanga sihthlak thiam a ngaiin nu leh pate pawhin an hriat tham loh khawpa te sihthlak a ngai thin. Tichuan nawalh bawk erawh an chhiar thlip thlep thin bik loh avangin panga vel hi kan phawi thin bawk a, a ruk thei ang berin kan ak a, Pu Mawia te inhnuaiah chuan chhunah pawh meizial bung zawngin kan lut fo thin. Kuhva eiin meizial a zukna bunga a sen kai hi tui bik turah kan han ngai tlat mai bawk a, meizial bung sawm vel han chhar fuh chu kan intithei ve hle thin a, kan thianpa Rothianga hian meizial hi a zu tawi thei khawp mai a, buhfang chenin a zu thei a. A chang phei chuan hmawlhte hmangin a zu thin a, huaisen kan ti thin khawp mai. TPA’n apa lighter a ruk kha aw kan va han chhuang thei tak. Kha lighter-ah khan Arsi lem panga hi a chuang bawk a, mawi hi kan han ti khawp a, TPA lah tlawn deuh zel a ngai thin bawk nen, hnap ngah thin viau mah sela a bulah kan tal deuh reng mai.
Pu Mawia te inhnuai bawk hi alawm thil tam tak kan zirna hmun chu. Aia upa zah kan zirna hmun a ni a, an hmun phiah thlakna kaw lian ber chu aia upate chanpual liau liau a ni a, an ni aia kal hmasa pawh ni ila aia upa an rawn kal thlen (vah luh thlen tih tur ni zawk awm tak) chuan lo ken ngei ngei tur a ni ringawt. U Lalhmuaka kha a sual hi kan ti thei khawp a, kan ken hnuah pawh kan chalah min pen ngei ngei ziah a, kan tap ri ngam si lo kha mittui tla pur chungin kaw dang kan zawng a, TV hmai chanve lan theihna tur kua hi kan hmuh chuan lawm takin kan thlir tluan thak peih tho. Tin, tumah benchhen loh tur. Chu chu thupek pawimawh tak a ni a, khuh emaw hauchhiau emaw a rem lo bur. Kan thianpa Rothangpuia khuh tur a hmui kan han hup pui kha ka theihnghilh thei lo, bungbu chunga chhuat awng atanga TV a thlir dauh dauh laiin a khuh a chhuak thut mai a, a ri hreih hman tihah chuan rang takin a hmui kan han hup pui a, bungbu chung chuan remlo takin a khuh thei ta hram a nih kha. Ka zirchhuah leh pakhat chu hmawlhte ken sa thin tur. Kan enna kua atanga alo en theih loh chuan a zawn tak, inchhung lamah mi an awm tihna a ni a, chutiangah chuan hmawlhtea na taka hawlh thin tur. Amaherawhchu chutianga kan hawlh chuan a then chuan an sawi a, a neitute’n an hriat chuan tui sa leih an chin avangin chin tam chi a ni ngai lo thung. Uluk taka bih laia tui sa han inleih chu nuih a za duh lo thin khawp mai.
Pu Mawia te inhnuai hi a hniam hle a, feet thum a tlin phak ka ring chiah lo. thlang lam chu lo tling pawh nisela TV enna hmun vel tak chu feet hnih aiin a sang hauh lo ang. Chutiangah chuan an vawkin lam atangin kan lut ru thin a, darkar khat aia rei mah tur hi chhuat awng atanga TV bihin hun kan hmang thin a, bungbu deuh reuh, saisir deuh chung hian rem lo takin kan bih chho ngar ngar thin a, ring a kham lutuk hi kan han kun leh vak a, lehlam hawi zawngin kan han bih chho leh a, a chang leh kutin kan biangah kan dawm pah bawk a, position a rem tak tak lo nain film pakhat chu kan tlingtla ve zel mai thin bawk a. Ka la hriat reng chu Bruce Lee channa, kha a tawp lama kawr eng ha a misual a beihna kha. Ava han hmuhnawm tak em aw……