Sericulture Department Minister Lalthansanga’n nimin khan Thenzawla C. Laltanpuia Muga Farm a tlawh a. Sericulture Department a thawktu ten an tawiawm.
Sawrkar thuchhuahin a tarlan danin Muga Silk hi khawvela silk man to ber a ni a. Muga silk thar chhuak chi pangang vulh hmanga kuthnathawktute eizawnna siamsak hi Sericulture Department, Mizoram leh Central Silk Board hmalak mekna a ni a. Tunah hian Central Silk Board, Ministry of Textiles, Government of India kaltlangin Sericulture Department, Mizoram chuan Muga Project (Augmentation of Muga Culture in Mizoram) chhungkaw 500 tuam tur a kalpui tan mek a ni.
Fisheries department changtu ni bawk Lalthansanga chuan Thenzawla Fish Broodbank (sangha pui leh note tha siamna) siam mek chu a enpui nghal a. Pradhan Mantri Matsya Sampada Yojana (PMMSY) atanga pawisa hmuh hmangin Thenzawla Fish Broodbank hi siam a ni a. He Broodbank ah hian brooder pond pariat, Rearing pond paria, nursery tank sawmhnih paruk, hatchery, office cum laboratory, Chowkidar quarter, inspection bungalow, store room leh thil dang thawh mek a ni.
Tun dinhmunah hna 70% vel thawh zawh tawh niin, March 2024 chhunga zawh fel hman tum a ni. Minister chuan tha taka thawka, ram rotling ngei tur siam chhuak turin thawktute a chah a. Farmers ten sangha chi tha leh sangha pui tha an hmuh theihna tur atana tha taka thawka, tan la turin a chah bawk.
Fisheries Minister hi Fisheries Department Director, Joint Director leh Department official dang ten an tawiawm a ni.