Kan sawrkar thar chuan ram sum leh pai dinhmun sawhngheh kumah a puang a. Hna hmasa berah a neih dawn tih chief minister in a sawi tawh a. Thu lawmawm tak a ni. Amaherawh chu sum leh pai dinhmun sawhngheh kan sawi rualin khawi laiah tak nge hma kan lak dawn tih kan la puang chiang lova. CM thupuan tihhlawhtlin anih hun tur hi a nghahhlelhawm hle mai.
Kan ram sum dinhmun chhe taka min hnuk luttu hi eng ber hi nge ni tih chhui chiang a, a hautak lai hleh thlak hlawk hlawk ngama sawrkar a chet a ngai ang. Mitinin kan hriat chian em em kan sawrkar inrelbawlna hautak lutuk hi a hautak lo zawnga kalpui hmasak anih loh chuan mipui hian tih theih kan nei hranpa lo. Sum hautak na lai ber chu office expenditure leh hlawh a ni a. Hlawh hi pekchhuah tam loh dan ber chu rawih tlem a ni. Ruai tlem tur chuan lak tlem a, a awmsa ten theih tawpa hnathawh a ni mai a. Department tam takah post ruak hnawhkhah loh an sawi reng a, an hna chu a kal thei tho. A hmasa berin loh theih loh tih loh hi chu hnawhkhat lo phawt mai sela. Chutianga an tih avanga sawrkar hna kalmuang tur chu minister ten vilin tan la sela. Kan sawrkar hnathawk zat hi mi state ngaihtuah chuan a tam em em a. Mi state pawhin hnathawktu tlem zawk, thawk thei vek tho si an neih chuan kan ti ve thei ngei tur ani ang. Hnathawktute hian file te hi mahni in tlanpui dawr dawr khawpin indaih lo sela hna chu a kal chak tho ang. Hnathawktute inpekna cho chhuak turin minister hian nawr sela, company a thawkte angin thawk tam, thawktu tlem hian a kal theih a. Hlawh lamah tam tak kan hlep nghal dawn a ni.
Tin, office expenditure tihniam turin tan la sela. Motor neih fur maite hi sumthuni nu ani ringawt a. Motor chuan hlawh nei driver a keng tel nghal a. Driver nghet leh nghet loa thawk kha hlawh tam lo mahse office expenditure ti tamtu an ni tho. Sawrkar hian motor hi mimal ta hire hi uar in hmang tam rawh se. Chu chuan driver hlawh leh oil a mamawh tlem ber. A pawimawhah chauh motor hire sela. Department picnic tihte, mitthi ral leh huau huau a sawrkar motor awm dul maite hi kan ram sum dinhmun tichhetu an ni. Motor hi lei belh lo ngam rawh se.
Kan sawrkar officer te phone bill, electirc bill tam tak pek sak an ni pawh hi a tul lem lo. Hlawh tha tak an hmu tawh a. Facilities a umzui an ngai tawh lem lo. Umzuina tur state in pawisa kan nei lo a ni.
Mimawl ber pawhina chhuta office mamawh nilo mamawh anga pawisa hman ralna hi a tam em em a. Mahse, ngaiah an lo neih tawh a. Heng chauh nilo thil tam tak hi sawi danglam bawih bawih anih loh chuan kan insawhngheh kum chu a hlawhchham chiang hle ang a. Leiba pawh a la pung chho zual zel bawk ang. Insawhngheh kum hi bat belh tam kum ni lo hram rawh se.