Aizawl: School Education Minister Dr Vanlalthlana’n sorkar hnuaia hna laknaah duhsakna lantir tura lehkha ziak a awm a nih pawhin awmzia a awm loh tur thu a sawi.
Nimin khan education minister chuan Lawngtlai khaw chhunga zirna in hrang hrangte tlawhin thawktute nen an inkawm a. An inkawmnaah hian DIET chu zirtirtu turte zirtir chhawn lehna hmun pawimawh tak a nih angin thiamna tak an zirtir chhuah ngeina turin leh dikna dinpui ngam tur a huaisenna an zir chhuahna hmuna hmang turin zirlaite leh zirtirtute chu a chah.
School education minister chuan sorkar hnuaia hna laknaah a thiam leh phute chauh lak an nih tur thu sawiin, “Samagra Shiksha hnuaia mi 161 lakna turah pawh written exam bakah an thiamnate a tak a an hman chhuah thiam leh thiam loh endik nan ‘Demo-Teaching neih tura ruahman a ni a. Khawi hmun atang pawhin duhsakna lantir tura lehkha ziak a awm a nih pawhin awmzia a awm dawn lo,” tiin, tuna sorkar hna lak chungchanga kalphung thar hmanna hian nakin zelah mi taima, tumruh, a thiam leh phute chauhin hlawhtlinna an chan theih nana kawng sial lawkna a nih thu a sawi bawk.
Minister hova inkawmnaah hian Ngurhmingliani Chinzah, Principal, DIET-in kaihruaiin, DIET, Lawngtlaia thawktu indaih lohna leh building thawm that ngaite sawi ho a ni.
Dr Vanlalthlana hian Govt. Region Higher Secondary School leh High School, Samagra Shiksha leh District Education Office-te a tlawh bawk.
Minister hi Dr. Lorrain Lalpekliana Chinzah, Adviser to Chief Minister leh T. Lalhlimpuia, MLA-ten an tawiawm a. S.P, Lawngtlai, DIET leh Lawngtlai district School Education-a thawktuten an lo dawngsawng a ni.