- Ruata
Mahindra chuan an sub-4 meter SUV changkang leh mawi tak mai XUV300 chu hmel thar nen kum 2024 model tihchhuah tumin ruahmanna an siam mek a, a chhuah har tawh loh beisei a ni.
Mahindra XUV300 hi subcompact/sub 4 meter SUV huanga awm niin a elpui te chu he huanga SUV ho, Tata Nexon, Kia Sonet, Hyundai Venue, Maruti Brezza leh adangte a ni a. A huangchhungah hi chuan a changkang pawl leh hmanraw changkang hrang hrang kengtel tam ber pawl a ni a. India ram mai nilovin ramdangah pawh an hralh chhuak nasa viau a ni. Mahindra XUV300 thar tur hi facelift model kan tih ang kha a ni dawn a. Hetiangah hi chuan nasa takin a rawn danglam bawih lo thin tlangpui a, chutihrualin design, kentel leh khawlah te thil thar hrang hrang kan hmu thin thung a ni.
- Design
Tunhnaia hmel thar nena SUV tihchhuah leh, design hnaivai ho pawl turin Mahindra pawh hian an XUV300 hi an rawn duan beisei a ni a. Kum 2025 atanga hralhchhuah tur Mahindra BE line-up ho design zula duan tho niin XUV300 thar tur hian hmel thar mawi leh changkang tak a nei dawn a. A hmaa a bang kual mum lai ho pawh a ki hriam deuh vak tawh dawn a, drop-down LED daytime running lamp thar kan hmu dawn bawk a. A hma bawrah hian two-part grille kan hmu ang a, hei hian a laiah air intake lian tak a nei dawn bawk a ni.
A hnunglamah hian tailgate design thar hlak kan hmuh hmel bawk a. C-shaped tail lamp an tih chu a rawn nei ve ang a, a tailgate-a number plate awm thin pawh a bumper-ah a rawn awm tawh dawn a ni. Chutihrualin tuna chhuak mek nena khaikhinin danglam dawrh lutuk a ni lo tlangpui dawn a. A hmaa chhuak zul siin mawi takin a landan hi an rawn tuaithar dawn a ni.
- XUV400 EV nen kentel hrang hrang intawm dawn
- Tunhnaia Mahindra company in an ‘update’ thar Mahindra XUV400 in a neih ang hmanraw hrang hrang chu 2024 XUV300 lo chhuak turah hian kan hmuh hmel bawk a. Heng zingah hian dashboard thar mawi leh changkang tak te bakah 10.25-inch screen, 360-degree camera, cooled seats, rear AC vent leh thil dang dang a tel ang a. A changkang dawn viau a, kimchang zawkin kan la hre chho zel turah han beisei ila.
- A khawl
A hmaa miin a neih ang 1.5-litre diesel, 1.2-litre turbo petrol leh 1.2-litre direct injection turbo petrol (TGDI) BS6 Stage II norms mil tawh chu he SUV hian a la hman zui hmel a. XUV300 facelift hian Aisin atanga lak 6-speed automatic (torque converter) transmission chu a khawl hoa chak tha ber 131hp power pechhuak thei 1.2-litre turbo-petrol (TGDI) engine-ah a rawn keng tel dawn bawk a ni. He transmission hi Skoda Kushaq, Volkswagen Taigun, Skoda Slavia leh Volkswagen Virtus-ah te an 1.0-litre TSI turbo-petrol engine-ah te kan lo hmu tel tawh a ni. Engine dang pahnih hi chuan 6-speed manual leh automated manual transmission te duhthlan tur an rawn nei thung dawn a ni.
- XUV300 EV June thlaah?
Mahindra hian XUV300 electric hmang chi zawk chu kumin June thlaah hian an tlangzarh hman beisei a nih thu media report hrang hrangin an tarlang a. Hei hi electric SUV-a XUV400 aia hniam hret tur leh tlawm hret tur a ni dawn a. Tata Nexon EV te nen pawha inel tawk tak tura ngaih a ni.
Mahindra XUV300 thar tur chungchanga kan hriat duh kimchang chu an tlangzarh hnai tawh bawk a kimchang zawk ten kan la hre chho zel ang a. Company lam la ngaihchan phawt a ngai dawn a, India ram chuan sub 4 meter SUV tha tak a neih belh leh dawn niin a lang a, a hmaa chhuak tawh mah ni se tunah hian hmel thar nena lo chhuak tur a nih avangin mi tam tak a rawn hip lehzual beisei a ni a. Market lamah pawh Mahindra dinhmun chu sub 4 meter SUV huangah ngat phei chuan a vawrh leh dawrh i han beisei ang aw!