February 6, Thawhleh zan khan AFC Asian Cup semi-final hmasa zawk khelh a ni a, Jordan chuan inlehthalna lian an thlentir a. Champion tura rinkai South Korea chu si hnih faia hnehin a vawi khat nan Asian Cup final an lut.
Asian Cup-ah vawi hnih champion tawh South Korea hi Jordan lakah hnehna chang a, final lut tura rinkai zawk an ni. 1960 hnu lamah a vawi khat nan champion ngei tum mah se semi-final-ah an vanduai a, an hneh ngei tura ngaih Jordan an paltlang zo lo. South Korea leh Jordan te hi Asian Cup khel tur zawnnaah group khatah an lo awm tlang tawh a. Group- E-ah South Korea an champion a, pahnihna ni chungin Jordan an tlang ve bawk. Heti a nih vang hian Jordan paltlang turin Jurgen Klinsmann-a enkawl South Korea an inringtawk hle naa, an vanduai ni a ni tlat thung.
South Korea tan hian Bayern Munich defender Kim Min-jae chu hrem vangin a inlan thei lo. An defender pawimawh Kim Min-jae ten lovin an tlarhnung a phui zo lo. South Korea hian Jordan hi an nawr hle a, goal an thun leh penalty an hmuh zet tawh pawh hnawlsak an ni bawk. Tottenham forward Son Hueng-min chuan Korea tan hmahruaina goal a thun naa he goal hi offside vangin hnawl a ni thung. Son goal hnawl a nih hnuin penalty an hmu leh hman vuai, Inkhel thununtuin penalty spot kawk tawh mah se VAR rawn a nih hnuin penalty hi hnawl a ni zui leh a, Korea an vanduai nawn leh.
An him hram hram hnuin Jordan in goal an thun ta nge nge. Second half tan tirh lam minute 53-naah fuh zetin an khingpuite an nawr tlang a, Yazan Al Naimat chuan mawi taka pet goal in hmahruaina goal a thun. Goal chhuah hmasa zawkah an tan vangin South Korea in goal thun tumin tan an khawh nghal chiam a, tauh luh theihna hun remchang nei bawk mah se an chhawr tangkai thei lo. Rin loh takin Jordan an khel tha chhunzawm a, goal thun hmasa zawkah an tang nawn leh. Tha zeta a khalh tlang hnuin Mousa Al-Tamari chuan minute 66-naah fuh zetin a pet goal a, an goal hnihna thunin, an hmahruaina a tizau.
Si hniha hma an hruai hnuin Jordan in an goal an veng zui nasa a, ball chang tam mah se South Korea in hlauhawm an siam hleithei meuh lo. Goal luh belh lovin inkhel a tawp a, Jordan chuan mak tak maiin South Korea an hneh nawlh a, Asian Cup-ah a vawi khat nan final an lut. Jordan hian inelna thlengtu Qatar leh vawi thum champion tawh Iran te inkhela chak zawk zawk an hmachhawn zui leh ang.
Fifa ranking-ah Jordan hi South Korea hnuai 64-na daiha awm an ni a, tun hma lamin South Korea hi vawi khatmah an la hneh lo. Taeguk Warriors lakah record nei chhe viau mah se inkhel pawimawh tak; semi-final-ah chak zawk an ni teh tlat a, Asian Cup final an khel dawn ta hial a. Inelna lianah rin phak baka chethain mumang ramah an cheng chhunzawm zel.
South Korea head Coach atan lak luh a nih tumin footballer lar Jurgen Klinsmann chuan Asian Cup atanga teh turin fans leh media te a ngen a. Kum 64 zet hnuah Asian Cup trophy an lak leh tur thu a tiam bawk. Amah tehna tur ber Asian Cup-ah final an luh zawh tak loh vangin Klinsmann hma lam hun tur a chiang lo thar. Klinsmann hi a chhuah mai hlauhthawnna lian tak a awm a. German manager a chhuak a nih chuan an player pawimawh Son Hueng-min-a’n international football a chawlhsan mai an hlauthawng ru viau bawk. South Korea hian Klinsmann leh an forward pawimawh Son an chan rual a nih chuan an tan channa nasa tak a tling ngei ang.