Aizawl : MPCC Vice President Lalnunmawia Chuaungo chuan nimin khan Assembly Constituency bial hrang hrang – Tawi, Lengteng, Tuichang, Champhai, East Tuipui leh Hrangturzo biala Congress party hruaitu te infuihtharna hun a hman pui.
Hun hmanpuitu Lalnunmawia Chuaungo chuan BJP sorkarin Zo hnahthlak hnam leh sakhua tana himlo, FMR tihtawp leh border fencing kalpui tuma hma a la chu Mizoram tan a him lo va, na taka an dodal dawn tih a sawi a. “Myanmar-a kan unaute leh a bul vel Mizorama chengte chakkhai inpurtawnna leh ramria insumdawn tawnna tenau a buai dawn. Chhiat thata inkalpawha infiamna thlenga nei ho dial dial te nena kan inzawmna chhut chah tumna hi kan hnam tan a himlo hle a ni,” a ti.
Zofa te inlungrualna chak leh tha tak tichhe tura Manipur CM Biren Singh leh Assam CM Himanta Biswas Sarma te tang dunin, Central BJP sorkar an ngenna vanga ramri hung tumna hi thleng tih sawiin Lalnunmawia Chuaungo chuan, “CM te pahnih duh dana FMR tihtawp a, ramri hung tura ruahmanna siam hi a tlawmthlak takzet a. Kan sorkar hian na taka dodal turin kan beisei a, Congress party chuan kan unaute nena min daidanna awm tur hi kan do tlat dawn a ni,” a ti bawk.
Lalnunmawia Chuaungo hian, “Hruaitu chuan a hote chu thu mai ni lovin, thil tihin a tiphur thin a. Hlauhna dah thaa hmalam pantu hruaitu kan nei a, chu chu Pathianin a tanpui thin,” tih a sawi a. Congress party chu a awm mai mai dawn lo va, Pathiana innghat chungin ram leh hnam, sakhaw tan an tho chhuah leh dawn tih a sawi.