Serchhip District Level Convergence Committee chu nimin khan (SDO Sadar) Rebecca Laldinmawii Hrahsel hovin an thukhawm a, Poshan Abhiyan Convergence chungchang an ngaihtuahho.
Block Level Convergence Committee-a an thurel te thlirhovin, Serchhip District chhungah block pahnih – Serchhip leh E. Lungdar Block te awmin heng block huamchhungah hian department hrang hrang te telna convergence committee din niin, Poshan Abhiyaan tluang taka kalpui a nih theih nan rawtna an thlen a. Heng block huamchhunga Anganwadi Centre hrang hrangah tui connection la nei lo te, gas connection la nei lo te leh ek in tha tawk lo chungchang te an sawiho a ni.
Retaining Wall leh Creche building sak dan tur te leh common nutri garden hmunhma neih dan tur te an sawiho a. District level-a chinfel theih chin te leh state level a thlen ngai te then hrangin, block level-a an thurel te a tul angin state level-ah thlen leh ni se, an ti.
Thutkhawm kaihhruaitu Rebecca Laldinmawii Hrahsel chuan Poshan Maah tha taka kalpui a nih theihna tura tanho a ngaih thu a sawi a. Department mal chauhin kenkawh theih a nih loh avangin line department ten theihtawp chhuaha an tawiawm tlan a tul thu sawiin, hmalakna hrang hrang kalpuite tha taka hlen chhuah a ni thin chu lawmawm a tih thu a sawi bawk.
Poshan Abhyiaan hmang hian naupang kum 6 hnuailam thang thei lo, an kum leh an rih zawng inmil lo lutuk te, an san zawng leh an rih zawng inmillo lutuk te nuaibo tum a ni a. Hmeichhe tleirawl leh nu hote zinga thisen tlakchhamna anaemia awm thin tihhniam leh nau pianghlim buk zang lutuk awm thin tih hniam tumin mipui vantlangah a zau thei ang bera zirtirna leh inhrilhriatnate neih thin a ni.
Nimin vek khan Lawngtlai-ah pawh naupang kum 6 hnuailam, hmeichhe tleirawl, nu naupai leh nau pawmlai nei ten ei tur tha an hmuh ngeina tur leh an hriselna tihhmasawnna tura kum 2024-25 chhunga hmalak dan tur relin District Convergence Action Plan on Poshan Abhiyan Committee chu an thukhawma, SDO (S) Margaret Vanremmawii’n a kaihruai.
Poshan Abhiyan Scheme in a huam naupang, hmeichhe tleirawl, raipuar leh nau pawm lai nei ten ei tur hrisel an dawn ngei theih nan leh an hriselna tihhmasawn nana thil pawimawh hrang hrang an dawn theih ngeina tura sawrkar department hrang hrang thawhho dan tur an sawiho a. Tui thianghlim leh inthiarna felfai an neih theih dan tur te, an chenna leh zirna in, Anganwadi Centre te kawlphetha nen a thlunzawm a nih theihna tur te, hmathatna kim tak a an dawn theihna tur a Aadhar-a ziahluh an nih theihna turte sawi ho a ni a. Thlai thar hrisel leh thianghlim an neih theihna turin Anganwadi awmna hmun ahte chuktuah huan siam dan turte rel a ni.
Heng hmalakna hr- ang hrang tihlawhtling tur hian Lawngtlai district-a sawrkar department leh tlawmngai pawlte thawhho a pawimawh thu an sawi a. Hmalaknate uluk taka enzui ni se, an ti bawk.