February 6, Thawhleh zan khan FA Cup fourth round khelh chhunzawm a ni a, Liverpool hmachhawn turin Southampton in Watford an hneh. Inkhel dangah Leeds United leh Coventry City in hnehna an chang ve bawk.
Championship lama tlahniam ta Southampton St. Mary’s Stadium-ah championship-a an elpui Watford an mikhual a, an mualah an khel tha hle. An khelh hmasaka an hneh zawh loh Watford lakah khel tha viau mah se chawlhlawk hmain goal an thun thei lo teh tlat. Chawlhlawk hmain goal thun thei bik lo mah se chawlhlawk hnu lamah goal thum ngawt an thun a, Liverpool hmachhawn turin an tlang chiang ta hle.
Hun rei tak goal an thun theih loh hnuin Saints tan hian Sékou Mara chuan Ché Adams siamsak atangin hmahruaina goal a thun a, a muman an kheng thla. Hmahruaina goal an thun hnuin an khel tha zui viau a, minute 58-naah goal hmahruai thuntu Sekou Mara chuan Ché Adams siamsak atang bawkin an goal hnihna a thun a, an hmahruaina a tizau.
An tualzawlah ngei si hnih faia hma an hruai vangin Southampton an phur a, inrintawkna sang zawk nen an inlan chhunzawm. Saints tan hian goal hmasa pahnih siamchhuak tawhtu Ché Adams chuan minute 76-naah an goal thumna thunin an chakna a nem nghet. Adams goal thun hnu hian goal dang a luh belh thei tawh lova, Southampton chuan last 16 an lut zui ta a ni.
Last 16-a Liverpool hmachhawn tur Southampton hi inelna hrang hrangah an khel tha tluang viau a, khelh 24 chhung zet tlawm nei lovin an kal tluang mek. Championship-ah pahnihna ni mek Saints hian an club chanchina an tlawm loh zawn rei ber hun an tawng mek a ni a. Champion tura rinkai ber Liverpool lakah fiahna hautak tak an hmachhawn a ngai dawn ta thung.
Thawhleh zana FA Cup inkhel dangah Leeds United chuan Mimuala an khingpui Plymouth Argyle chu 4- 1 ngawtin an hneh a, last 16 an lut ve bawk.
Plymouth leh an mikhual Leeds te hi hun pangngaiah 1-1 in an inhnehtawk leh zet a, extratime a goal thum thuntu Leeds in hnehna pawimawh an chang. Leeds United tan hian Wilfried Gnonto, Crysencio Summerville leh Georginio Rutter ten goal an thun a. An goal khat dang hi Plymouth player Ryan Hardie-a’n an lama a tih goal a ni ve thung.
Inkhel dangah Coventry City chuan an mikhual Sheffield Wednesday chu 4-1 in an hneh a, last 16 a lut ve bawk.