India chuan Thawhlehni khan Myanmar-a Rakhine state-a a ram mi awmte chu himna a derthawn em avangin a rang lama chhuahsan turin a ti.
A thenawm rama tharum thawhna a nasat thar leh mek laia thurawn a tihchhuah hmasak berah external affairs ministry chuan Indian-te chu boruak a muanawm loh em avangin Rakhine-a zin rih lo turin a ti a, inbiakpawhna leh ni tin mamawh thil a vângin a tha lo hle niin a tar lang bawk.
“Himna a derthawn zel avangin inbiakpawhna, landline thlengin a tha lo va, ni tin mamawh pawh lak pawh a buaithlak deuh tak avangin Indian zawng zawngte chu Myanmar-a Rakhine state-a kal rih lo tura thu rawn an ni,” a ti.
“Rakhine state-a Indian la awm zawng zawngte pawh a rang lama chhuahsan tura hriattir an ni bawk,” tiin foreign ministry thuchhuah chuan a tar lang.
Myanmar-ah hian February 1, 2021-a sipaiten mipui rorelna paih thlaa thuneihna an chan leh hnuah anmahni duh lotuten paih thlak tumin an bei let mek a, tharum thawhna a thleng nasa hle.
October atang khan Rakhine state leh hmun dang eng emaw zatah hnam bil pawl hrang hrang leh Myanmarese sipaite hi an inbei nasa zual bawk.
India nena an inrina hnaia Myanmarese khua tam tak chu November atang khan sipaiten an chân mawlh mawlh a, inbeihna a nasat avangin India-a tlan lut pawh an pung a, hei hi New Delhi chuan an tlan luhna, Manipur leh Mizoram tan a him lo thei niin a ngai a ni.
Myanmarese sipaite hian anmahni beitute beih nan hian thlawhna a hmang nasa hle a, civil mite awmna thlengin a kap nia sawi a ni.
Myanmar hi India nena km 1,640 zet inri leh inthian tha an ni a, hmarchhaka a state eng emaw zatin a ri a, heng zingah hian hel pawl tamna, Nagaland leh Manipur pawh a tel.
Kar hmasa khan tharum thawhna chawlhsana mipui rorelna tun din lam hawi leh tawh turin Myanmar hi a lo ngen tawh.
External Affairs Ministry thupuangtu, Randhir Jaiswal chuan, “Myanmar dinhmun chhe zel hi keiniah hian nasa takin nghawng a nei a ni,” tiin February 1 khan a sawi.
“A thenawm leh a thian tha a nih angin India hian heng tharum thawhna hi tawpsana mipui rorelna ram a nih leh theih nana ke pen turin a duh a ni,” tiin kar tina thuthar lakhawmtute a kawm thin hunah a sawi a ni.