MNF thalaiten Duhoma sorkarah thuneihna hman sualna nasa tak thlengah puh

Aizawl: Chief Minister Lalduhoma kaihhruai sorkar hnuaiah doctor leh police-te lakah thuneihna hman sualna nasa tak thlengah MNF thalai, Mizo National Youth Front (MNYF)-in an puh.

Thuchhuah an siam danin May 10, 2023-a Chief Minister Lalduhoma’n court-a criminal complaint a theh luh bawhzuiin, Cyber Crime Police Station, Aizawl chuan Lalduhoma hming tar lanna thu post pakhat an chhui zui a. J. Rosangpuia (Spa Jongte) chu thil tisuala puhin, police chuan February 5, 2024 zan khan Falkland Venga a chenna in atangin an man a, Aizawl Police Station lock up-ah zan khat a riah hnuah February 6, 2024 khan court-ah hruai a ni a. Police-ten darkar 72 kawl an dilna chu court-in a phalsak a ni.

Dan pangngai angin police-te hian February 6, 2024 thim hlimah J Rosangpuia hi lock up-a dah turin a hriselna a tha tawk em tih Civil Hospital, Aizawl-ah an enfiahtir a, amah hi thla hnih kaltaa accident avanga nikhawhrelova lo awm tawh, nghawng ruh fel lo (cervical spondylosis) nei, inenkawl lai a nih bakah BP sang nei a ni.

Civil Hospital, Aizawl-a endik a nih lai hian damdawi eitir nghal ni mah se, a BP a tlahniam thei lo a, medical officer duty chuan police station lock up-a khung turin a hriselnain a tlin rih lo tih report a ziak a. Police-ten chhuah lailawktir rih mai an tum laiin, chief minister office atanga chhuak ni ngeia ngaih thupek khauh tak, police leh doctor-te hian an dawng ta a, police-te hian J. Rosangpuia hi Civil Hospital, Aizawl-ah bawk hruai nawn lehin, doctor duty chu medical exam tihnawn luihtir leh a nih hnuah police-te hian police station lamah an hruai leh ta a ni.

MNYF chuan, “Police-te leh doctor-ten thuneitu sang ber atanga na taka nawr luih an tawk tih an hriat hian J Rosangpuia chhungte leh a thian tha, chanchin ngaihvena police station-a kalte chuan mihring thih leh dam kar thil a nih avangin J Rosangpuia hriselna dinhmun hi enfiah nawn leh an ngen a, zan dar 10 hnu lamah police station atang hian Civil Hospital-ah bawk hruai nawn lehin, senior doctor-in a hriselna dinhmun hi a endik nawn leh ta a, a BP hi a sang hle tih finfiah nawn leh a ni a, a hriselna dinhmun hi vil zui ngai a ni tih finfiah a nih avangin senior doctor hian Civil Hospital-ah hian a admit nghal a ni,” an ti.

Hetianga Chief Minister Lalduhoma pawi sawitua puh a nih avanga J Rosangpuia chunga hleilenna nasa tak a thleng leh a tisual ngei em tih court-in a finfiah hma hauha a chunga mihring dikna chanvo bawhchhiatna nasa tak a thleng hi an dem tih tar langin MNYF chuan, “Police-te kutke-a hmang luia sorkar thuneihna hman sualna nasa tak a thleng leh doctor-te thiamna leh hriatna rilhlelhsak an ni te, mualpho thei ang bera medical exam vawi thum lai tih nawntir an ni te hi Mizoram chu sawi loh, India ram hmun dang leh khawvel hmun dangah pawh thil la thleng ngai lo niin kan hria a. Chief Minister Lalduhoma sorkar hnuaiah hetiang taka doctor-te meuhin hmuhsit leh rahbeh an tawk ta mai hi na kan ti,” an ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427