Aizawl : Tunhnaia social media lama sawi hlawh tak zing ami Govt. Nepali Primary School, Rangvamuala zirlai ten class room nei lova school kawta class la nia sawi chungcha- ngah nimin khan MZP hruaitu ten he school hi an tlawh a. Thawktute hnenah an harsatna leh an dinhmunte an zawtchiang a ni.
MZP hruaitu ten an sawi danin Govt. Nepali Primary School Rangvamual hi an building a tet avangin zirlai tam zawkin sikul chhung an chang lova, pawn ni sensa hnuaiah class an la thin. Zirtirtute pawh- in awmna tur an neih loh avangin chaw chhu- mna (kitchen)-ah an thu a, chuti chung chuan zirna an kalpui a ni.
MZP Branch Rangvamual pawhin Govt. Nepali Primary School Rangvamual chu tunhma deuh atang tawhin thuneitute hnenah ngaihsak turin an ngen tawh thin niin MZP hruaitute chuan an sawi a. Aizawl Minicipal huam chhunga sawrkar sikul dinhmun chhe lutuk leh ngaihthaha la awm fo chu mak an tih thu leh pawi an tih thu an sawi. “World Class education kan sawi tawh laia zirnain ngaihsak a hlawh tak tak loh zia tarlangtuah MZP chuan a ngai” an ti a ni.
Govt. Nepali Primary School, Rangvamual-ah hian Nursery zirlai 30, K.G zirlai 22, Class I zirlai 27, Class II zirlai 19, Class III zirlai 16, Class IV zirlai 13 awm mekin, an vaiin zirlai 127 an awm mek a, zirtirtu nghet 2 bakah MR zirtirtu pakhat leh SEDP zirtirtu pakhat an awm mek niin MZP thuchhuah chuan a tarlang.
MZP chuan nisa leh ruahsur hnuaia zirna kalpui chu engtikawngmaha an remtih loh thu sawiin, tunkar chhung (February 10 ral hma) ngeia zirlaite harsatna sukiang tura hma la turin sawrkar an puht a, an huntiam chhunga sawrkarin hma a la lo a nih chuan a tul anga hmalak zui an tum thu a sawi. “kan zirlaipui ten nisa leh ruah sur hnuaia lehkha an zir avanga an hriselnain a tuar a nih chuan, sawrkarin mawh a phur ang” an ti bawk.
MZP hruaitute hian, Rangvamuala Govt. Primary School leh Govt. Middle School-te pawh tlawh nghalin, Govt. Middle School chu a building a tlabal tawh hle niin an sawi a, zirlaite tan pawh a him tawh lova an hriat thu sawiin, a rang lama ngaihsak turin sawrkar thuneitute an ngen bawk a ni.
Tun thla ni 5 khan Aizawl West I bialtu MLA, Adviser to CM (Finance) ni bawk TBC Lalvenchhunga’n a bial chhungah class room nei lo, pawna class la an awm thu hi a facebook page lamah a post-a, sawizui a hlawh hle a, hei hi MZP hruaitute chuan bawhzuiin nimin khan an enfiah a ni.