Prime minister hlui, Atal Bihari Vajpayee lem, amah tiat chiah chu February 12 hian Parliament-ah Central Hall of Parliament-ah hun chhuah a ni dawn.
Vajpayee lem (portrait) hi President Ram Nath Kovind-an a hawng dawn a, Vice President Venkaiah Naidu, Prime Minister Narendra Modi, minister leh party hrang hrang hruaitute an tel bawk ang.
BJP hruaitu, Vajpayee prime minister vawi thum lai a ni a. A hmasa ber chu kum 1996 khan ni 13 chauh a ni hman thung a. Kum 1998-99 khan thla 13 chhung a ni leh a, kum 1999 leh 2004 inkar term erawh a hmang tluan thung.
December 25, 1924-a Gwalior, Madhya Pradesh-a piang, BJP veteran hi August 16, 2018 khan hun rei tak a damloh hnuah a thi a ni.
India-in civil mite chawimawina sang a pek thin, Bharat Ratna pawh lo dawng tawh, Vajpayee hi a lem Parliament hmun pawimawh taka tar tur hian December 18-a Parliament Portrait Committee-in thutlukn an siam a, he committee hi Lok Sabha Speaker Sumitra Mahajan-i kaihhruai a ni.
Meeting-ah hian Deputy Speaker M.Thambi Durai, Congress hruaitu Mallikarjun Kharge, BJD atangin B.Mahtab, TMC atangin Sudip Bondopadhyay, TRS atangin Jithendra Reddy, Shiv Sena atangin Ananth Geete leh BJP atangin Satyanarayan Jatia te an tel a ni.
Parliament House-a Central Hall-ah hian tunah hian prime minister hlui Jawaharlal Nehru, Indira Gandhi leh Rajiv Gandhi te thlalak pawh tar mek a ni.