Philippines ram thuneitute chuan suntut hri hlauhawm tak chu an ram chhung hmun hrang hrangah a leng tih an puang a, an khawpui, Manila leh a chhehvelah pawh a leng tih an sawi.
January 26 thleng khan sentut hi a kai mi 1,813 awm tawhin mi 26-in an thihpui tawh niin Department of Health Epidemiology Bureau chuan a tar lang a. Nikum aiin he natna veitu an punna hi 74% zet niin an sawi bawk.
Sentut hi naute leh naupangte tan a hlauhawm zual a. A danna la lo mtd 2.4 vel zet tan a hlauhawm zual hle niin an sawi bawk.
Thuneitute chuan nu leh pate chu dengue vaccine, Dengvaxia an lak hnuah sorkar health centre-ah te a invenna la turin an ti.
Philippines-a World Health Organisation (WHO) aiawha awm, Dr. Gundo Weiler chuan invenna damdawi la hi 95% ni tura an tih laiin an tling pha lo hle tih a sawi a. Kum 2016 khan a la tur zinga 75%-in lain kum 2016-ah phei chuan 60% chauh a ni a, nikum phei kha chuan hei aia hniam lehzual tura an ngaih thu a sawi.
Sentut natna thlentu hi boruaka insiam chi a ni a, khuh atang leh hahchhiau atang pawhin a inkaichhawn theih a. Khawsik, khuh, hnaptui leh mit sen rumin a nate chu an awm thin a. An hmai leh taksa chu a hnuah a sen chhuak thin a ni.
Health Secretary Francisco Duque chuan sentut chi khat tho, bronchopneumonia an tih chu thihna thlen thei a ni a, hei vang hian nu leh pate chu invenna lam ngaihtuah rang turin a ti a. “Nghah chi a ni lo va, tlai palh theih a ni,” a ti.
A tirah chuan sentut lenna hi Metro Manila leh Luzon-ah chauh an puang a; mahse, nimin khan Department of Health chuan an ram hmun dangah pawh a leng tih a puan belh leh a ni.