Aizawl: Commissioner for Persons with Disabilities (PwD) Office chuan Mizoram Combined Competitive Examinations 2023-a PwD quota-a tling mi pathumte lawmpuina an hlan.
Nimina Aizawl Press Club-a inkhawm an buatsaihah hian MCS-a tling thar, Lalhmingmawii leh MF&AS-a tling Lalremtluanga te chu lawmpuina hlanin, MIS-a inziak tling, N. Vehneichhi erawh an khaw lamah a awm avangin he hunah hian a tel thei lo thung.
PwD Chommissioner Vanlaldiki Sailo chuan thu sawiin, Mizoram sorkar hian hna lak reng rengah PwD-te tan za zela pali aia tlem lo reservation a dah thu te, mi 100 dawnin PwD quota-in sorkar hna an hmu tawh tih sawiin, lawmpuina an hlante chu chhawrtlaka hna thawk tura a chah a ni.
Hna hmu tharte pawhin thu an sawi a, Lalremtluanga chuan lirthei chetsualna avanga ke tha lo ta a nih thu te, hrisel lohna avanga harsatna hrang hrang a tawh nasat thu te, mi pangngaite phak loa inhriatnate a neih nasat thin thu a sawi a, chuti chung chuan hlawhtlin tumin theih tawp a chhuah a, MPSC hnuaia hna laka vawi riat ngawt interview-ah a tlak tawh thu sawiin, a hlawhtlinna chu Pathian malsawmna a nih thu a sawi bakah amah anga taksa lama harsatna neite pawh an hlawhtling ve thei tih hriaa theihtawp chhuah turin a chah.
Mit lama harsatna tawk, khaw hmu fiah mang lo chunga MCS-a tling thei, Lalngaihawmi pawhin thu sawiin, pawl 12 a zirlai vel atangin a mit a tha lo tan a, hemi avang hian kum hnih vel chu zirna pawh a chawlhsan hial tih te, chutichung chuan theihtawp chhuahin lehkha a zir tih a sawi a, sorkarin taksa lama harsatna neite tana hna laka quota a siam chu lawmawm a tih thu leh hemi avanga amah pawhin hna dil ngam leh hmu thei a nih thu a sawi.
PwD quota-a combined exam-a tlingte lawmpuina hun hi Federation of Mizoram Disabled Organisation (FMDO) President Neihtluangi’n a kaihruai a, hna hmu thar zinga mi, N. Vahneichhi erawh a tel ve lo a, Remtluanga leh Ngaihawmi te hnenah hian lawmpuina thuziak hlan an ni.