Union budget session neih mekah nimin khan rorelna in sang zawk, Rajya Sabha-ah chuan eptu party – SP, BSP, RJD, TMC leh a dangten college leh university-a faculty recruitment system thar duh lohna nasa taka an au chhuahpui avangin rorel mumal lova tihtawp leh a ni.
Chawhma lama rorel inkhawmah pawh eptute hian he thil bawk hi aupuia an bengchhen avangin Chairman M.Venkaiah Naidu chuan a titawp a. Chawhnua inkhawm an tan leh veleh chairman hian BJP MP Bhupender Yadav chu rorelna in pahnih member-te hmaa president thu sawia Motion of Thanks pu lut tura a ti a. Yadav-an thu a sawi tan chiah tihin eptu member-te hi tho chhuakin a laiah an fuan khawm a. Chairman-in bengchheng lo tur leh ram pumin an chet dan chu a hriatpui a ni tih a hrilh pawhin an zawm duh lo va. Nasa takin an au rual a, engmah a tih theih tak loh avangin inkhawm chu nileng atan a titawp leh ta a ni.
A hma ni pawhin he thu avang bawk hian ro rel theih loh a ni tawh.