El Chiringuito journalist Edu Aguirre chuan footballer ropui chungchuang pahnih; Cristiano Ronaldo leh Lionel Messi te chungchang inhnial theih tak mai a sawi. Aguirre hi Portuguese superstar Ronaldo duhsak zawk saa ngaih ni bawk mah se a thil sawi thar lam ber, “Cristiano Ronaldo-a’n khawvela player tha ber berte Saudi Arabia-ah a hruai lut a. Lionel Messi erawh chuan Inter Miami-ah a thiante a hruai lut ve thung” tih chuan titi a siam zui hle.
Cristiano Ronaldo hian January 2023 khan Al-Nassr a zawm a, footballer langsar zingah Saudi Arabia pan hmasa ber a ni. Ronaldo an lak luh hnuin Saudi Pro-League in ngaihven an hlawh leh zual a, player langsar tak takin an zawm zui. Ronaldo hnua Saudi Arabia pan langsar zingah Neymar leh Karim Benzema te an tel a. Liverpool captain Jordan Henderson pawhin thawm a nei lian viau bawk. Player langsar tak tak khelhna a nih tak vangin Saudi Pro-League chu tualchhung league ngaihven hlawh tak a ni der tawh.
Kawng tam takah Ronaldo chunga chuang a, Ronaldo enpui lian ber Lionel Messi chuan Paris St-Germain-a contract a hman zawh hnuin Major League Soccer club Inter Miami a zawm ve thung. David Beckham-a club Inter Miami hi USA tualchhung league MLS ah club langsar an ni hran lo. Messi luh vangin player langsarin MLS an pan hran lo bawk. Chutihlai chuan Messi-a’n Barcelona-a a khelhpui thin Luis Suarez, Sergio Busquets leh Jordi Alba ten Inter Miami an zawm tawh thung.
Edu Aguirre hi El Chiringuito nen an thawh dun laia TV interview sawi hlawh tak vangin Ronaldo duhsaktu nia puh ni bawk mah se, “Cristiano Ronaldo-a’n khawvela player tha ber berte Saudi Arabia-ah a hruai lut a. Lionel Messi erawh chuan Inter Miami-ah a thiante a hruai lut ve thung” tih a sawi erawh hi chu tuin nge hnial thei ang a, tuin nge do thei ang.