Aizawl : Mizoram Pradesh Congress Committee Treasurer Dr Lalmalsawma Nghaka chuan sorkarin a ngaih pawimawh ber tur chu mi rethei leh chanhaite an nih thu sawiin, “Sorkar policy pawh mi retheite tapchhak thleng phak a ni ngei ngei tur a ni,” a ti.
Nilaini khan Hachhek constituency tlawhin Congress party te nena an inkawmnaah he thu hi Dr Lalmalsawma Nghaka hian a sawi a. Khawthlang mite zingah huan lo ram hmanga ei zawng an pung zel a, kum tin lo vah bansan a, huan hmun nghet kan neih zel hi ram economy than nan a tul thu a sawi.
Kum 2023 MLA inthlanpuiah Congress party chuan hnenah an chan loh hnuah insiamthat a ngaih thu sawiin, “Ram pumah Congress chhungkaw hrin tam tak an awm a, anni hian Congress a dinchhuah theih nan nasa takin ngaihtuahna an seng mek a, headquarters lam hruaitute’n hmun tina kan hotute thurawn ngaihthlak a, danglam ngam kan nih a ngai hle tawh a ni,” tiin, mi retheiten kawl eng an hmuh theih nana hna thawk thin chu Congress party an nih thu a sawi.
Dr Lalmalsawma Nghaka chuan, India rama Zo hnahthlak kristianete dinchhuahnana thil pawimawh ber chu sakhaw zalenna neih zel a nih thu sawiin, “BJP hi an lian tulh tulh a, ‘one nation, one religion’ dan an kalpui mai a hlauhawm a, chutiang hun a thlen lohnan tawngtaina nen Pathian hnenah nasa taka kan dil a ngai a. Central-ah BJP bawk an sorkar leh chuan nekchepin kan awm tawh dawn a, ei leh bar zawn kawng thlengin tun ai hian kan hniam zawk dawn a ni tih hi mi zawng zawngin kan hriat a ngai hle tawh a ni,” a ti bawk.