A ram inthlanpuia vote an thlak hma ni chiah, Nilaini khan Pakistan-a Balochistan province-ah bomb pahnih puakin mi 22 vel an thi niin thuneituten an sawi.
A hmasa zawk hi Pishin district-ah independent-a inthlan chuhtu pakhat party pisa tuala puak niin mi 14 an thi.
A hnu lawkah km 150 vela hla, Qillah Saif Ullah district-ah puak lehin mi pariat vel an thi a, hmun hniha bomb puakah hian hliam thahnem tak an awm ve ve bawk.
Tun tum an inthlan turah hian tharum thawhna a thleng nasain vote tihchingpen tumna pawh a awm tih a thang nasa hle.
Quetta khawpui atanga km 50 chuanga hla, Afghan ramri atanga chhimchhak lam km 100 vela hla ni bawk, Pishin-a bomb puak hi eng pawl mahin an tihah an la chhal lo va. Province thuneitute chuan mi 25-in hliam an tuar bawk tih an sawi.
Social media-a thlalak darhah chuan car leh motorbike te pawh a vawrh darh nasa hle tih a lang a. A puah lai hi candidate-in an election pisa chhunga a agent-te a kawm lai nia sawi a ni.
A puak hnuhnung zawk hi Qila Saifullah bazarpuiah a nih thu leh helaia JUI-F party election office chu bitum nia a lan thu police hotu pakhat chuan AFP news agency hnenah a sawi.
Ningania vote an thlak tur kaihhnawihah hian kar hmasa atang tawh khan Balochistan leh Khyber Pakhtunkhwa province-ah te tharum thawhna a thleng nasa hle.
Police-in bomb puakte hi an chhui zui nghal mek a, hliam tuarte pawh a bul hnai damdawi inah dah an ni.
Balochistan sorkar chuan inthlan chu ruahman lawk angin kalpui a ni tho dawn tih a puang nghal.
Province Information Minister Jan Achaizak chuan mipui rorelna kalhmang pawimawh tak tih tur chu hetiang firfiaka chetna leh nunrawnna hian a tibuai dawn lo tih X-ah a tar lang.