Nilai zan khan Asian Cup semi-final khelh zawh a ni a, semi-final hnuhnung zawkah champion lai Qatar chuan khingpui hautak Qatar an paltlang a, final an lut. Inelna thlengtu Qatar hian final-ah South Korea hnehtu Jordan an hmachhawn zui leh ang.
Al Thumama Stadium-ah champion lai Qatar in vawi thum champion tawh Iran an hmachhawn a, fiahna hautak an hmachhawn. An tualzawlah ngei goal an chhuah hma hle. Hma takah goal chhuah mah se an buai lova, an khelmualah champion zia an lantir. Goal thumin an khingpuite an chhang let a. Hun tawp dawnah tam zawk an nihna chhawr tangkai thei lo mah se an result a danglam phah tawh lo.
Al Thumama Stadium-a Qatar mipui sing tel pungkhawm hmaa Iran in bul an tan tha viau a, inkhel tan atanga minute lina lekah Sardar Azmoun chuan hmahruaina goal a thun nghal. Hma takah goal an thun vangin an phur a, Asia Cup-a champion ngun ber Japan record tluk thei turin final luh an tum hle. Final luh tum viau mah se hma taka goal an thun hmangin mualneitu an chhaihkawlh a ni ta ber a, Qatar er let an tuar lo.
Qatar hian an si phurh sut tumin thapui an thawh zui nghal chat a, goal pawh an thun har lo. Minute 17-naah Jassem Abdulsallam chuan Akram Afif siamsak atangin goal a thun a, an si phurh a sut. An si phurh an sut hnuin an che vel a hmuhnawm leh zual a, chawlhlawk hmain hma an hruai let hman. Chawlhlawk dawn hnaih minute 43-naah goal hmahruai siamchhuaktu Akram Afif chuan Mansi Abdoulla siamsak atangin hma an hruai letna goal a thun. Qatar goal hnihna thuntu Afif hian inelna neih mekah goal nga a thun tawh a, goal thun hnem ber ni mek Iraq forward Aymen Hussein aiin goal khatin a thun tlem zawk rih a. Final an la khelh dawn vangin topscorer neih theihna hun tha a la nei.
Chawlhlawk hma ang bawkin chawlhlawk hnu lamah Iran in bul an tan tha nawn leh a, goal an thun leh thuai. Minute 51-na lekah penalty an hmu. He penalty hi Alireza Jahanbakhsh chuan harsa lo takin a pet goal a, an si phurh a sut. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Hun tawp dawn hnaih minute 82-naah Mohammed Abdullah siamsak atangin Almoez Ali chuan hma an hruai nawn lehna goal a thun a, final lut turin an dinhmun a tha viau tawh.
Hun tawp rat thlengin Iran in tan an khawh a, an si phurh sut ngei an tumruh hle. An si phurh sut tuma an tan luatah an chesual a, minute 90+3-ah an player Shoja Khalilzadeh hnawhchhuah a ni. Si phurh zawk ni chunga tlem zawk an nih leh tak cheu vangin an si phurh an sut thei tawh lova, uiawm taka tlawmin final an lut zo ta lo.
Tarlan tawh angin Champion lai Qatar hian an mualah Jordan an hmachhawn zui leh dawn a, champion nawn leh theihna hun tha an nei mek. Jordan hnehna an champion thei a nih chuan kum 2004 hnu lamah Asian Cup-a champion zawn leh thei hmasa ber an ni dawn. Kum 2000 khan he inelnaa champion ngun ber Japan an champion a, Japan hi 2004-ah an champion zui leh bawk. Qatar hian an trophy an humhim thei a nih chuan Japan tih theih ang an ti ve chiah ang.
Asian Cup 2024 final hi February 10, Inrinni zanah khelh a ni dawn a. Lusail Stadium-ah Qatar leh Jordan in champion nih an inchuh ang.