Aizawl: Health Minister Lalrinpuii hmalakin Mizoram sorkar Health & Family Welfare department leh Sri Ramachandra Medical Centre, Chennai-te tangkawpin lung zai ngai nia doctor in an hmuhchhuahte leh enkawlna mamawhte tan bik ‘Free Cardiac Camp’ neih a ni dawng.
Free Cardiac Camp hi vawiin leh naktuk (February 9-10, 2024) chhung hian State Referral Hospital/Zoram Medical College, Falkawn-ah OPD-ah neih tur a ni.
He camp kaltlanga lung zai ngai hmuhchhuah mi sawmnga (50)-te senso chu Sri. Ramachandra Institute of Higher Education & Research, Chennai, Sastra University leh Sri. Shankara Heart Foundation, Chennai ten an tum dawn a. Hospital senso, thlenna, ei leh in leh Chennai atanga haw lehna (return ticket) hi sponsor-tuten an tumsak dawn a, kal lam senso erawh mahni intum tur a ni thung ang.
Damlo bakah anmahni hruaitu (attendant) pakhat thlenna leh hawna tumsak an ni bawk ang. Inentir tur ten doctor lehkha hlui ken tel tur a ni a. Registration hi inentir ni-ah a hmunah tih tur a ni.