Health Minister Lalrinpuii chuan damloten anmahni pawisa seng lova damdawi ina an inenkawl theihna turin health care scheme thar, Mizoram Universal Health Coverage Scheme duan mek a nih thu leh cashless system-a kalpui tum a nih thu a sawi.
Ningani khan a pisaah thuthar thehdarhtute kawmin Lalrinpuii hian a department enkawl hrang hranga sorkar hmalakna leh hmachhawp neihte a sawi fiah a. Mizoram health care scheme thar tur, duan mek chu kumin April thlaah peih fel hman an tum thu sawiin, “Mipui zawng zawng huapin kum khata cheng nuaih 5 thleng bill theih tura duan a ni,” a ti.
ABPM-JAY hnuaiah hian health insurance – golden card-ah mi 5,19,150 inziak lut an awm thu leh hei hian mipui a huam kim loh avangin mipui zawng zawng huap tur, Mizoram Universal Health Coverage Scheme chu sorkarin a duan mek thu sawiin, “Damloten anmahni pawisa seng loa damdawi ina an inenkawl theihna tur, cashless system a kalpui a ni ang,” tiin, hemi atan hian uluk takin sum hmuhna tur te, sum hman dan tur te, bill theih tur chin leh, rate bithliah tur hrang hrang te chu zirchian mek a nih thu a sawi.
Lalrinpuii chuan Civil Hospital, Aizawl chhawk zangkhaina tur, tuna Kulikawn Hospital Complex-ah khum 100 awm theihna tur, Civil Hospital, Aizawl, Annex chu Rs vbc 89.96 senga sak tum a nih thu a sawi a. He ruahmanna hi State Level Executive Committee-in an pawmpui tawh thu a sawi.
Zoram Medical College (ZMC) chuan tun hnaiah sorkar laipui atangin endikna a hmachhawn hnaih a avangin sum lamah harsatna an tawh mek chu Chief Minister Lalduhoma’n mamawh zualpui phuhruk nan Rs vbc 1.4 a ruahman thu a sawi.
ZMC enkawlna senso hautak avanga sorkar laipui kuta hlan mai tur emaw an tih hnuah tun hnaia union health minister a kawm tumin theihtawpa tanpui an lo inhuamin state sorkarin tha zawka kalpui theihna tur atan a bik taka tanpuina ‘special grant’ pek an tum chu project proposal pawh an theh luh tawh thu a sawi a. Lok Sabha inthlan hma ngeia 1st instalment pek chhuah hman an tum thu an sawi niin a sawi bawk.
Health minister chuan tertiary health sector lamah pawh sorkar chuan hmasawnna nei tur hian ruahmanna an siam mek thu a sawi a. Nakin lawkah chuan kal thlak, lung zai, cancer enkawlte chu Mizo doctor thiamten sorkar damdawi inah ngeih an tih theih thuai a beisei thu a sawiin, “A bik takin Cancer Hospital, Zemabawk-ah cancer zai theihna bungrua leh doctor a awm fel vek a, hnimhlum petu tur doctor, nurse leh puitu dang tur atan thawktu lakna tur pawh sorkarin min phalsak tawh a. Tun financial year chhung ngeiin hna ruakte hnawh khah phalna nei a, cancer hospital-a cancer zaina bul tan theih kan tum,” a ti.
National Health Mission hnuai atangin district hospital 10-ah test laboratory changtlung tak din tuma hmalak mek a nih thu sawiin, a thawh khatna atan district pathum – Siaha, Hnahthial leh Champhaiah hmalak hmasak mek a nih thu a sawi bawk.
SEDP hnuaia lak nurse/health worker-te chu rawih chhunzawmna tur sum a awm tak loh avangin chawlhtir a nih thu sawiin, “Hemi avanga health sector awngrawp palh thei venna turin thawktu awmsa semrual tura hmalak mek a ni a. Thawktu indaih loh zualna phuhruk tur pawhin department lama hotuten an zirchiang mek a ni,” a ti.
Social welfare minister ni bawk, Lalrinpuii hian Mizorama ruihhlo hluar mek do turin theihtawp an chhuah dawn a, ruihhlo do chungchang hi kohhran hmeichhe pawl leh NGO hrang hrangte nen an sawi ho tawh thu a sawi a. ZPM policy lian ber, thlai thar lei tihlawhtling turin a department chan, Women & Child Development department hnuaiah hmalak an tum thu a sawi a. Hemi atan hian inkaihhruaina tur pawh an duang mek niin a sawi.
Ruang phurh chungchang sawiin Lalrinpuii hian, “Ruang phurhna tur hian thil tul leh ngaihtuah tur tam tak a awm a, a kalphung tur guidelines kan duang mek a, a senso tur sum pawh tun budget session-a pass theih turin dah kan tum a ni,” a ti.
Tourism minister ni bawk, Lalrinpuii chuan, community based rural tourism ngaih pawimawh an tum tih a sawi a. Hemi atan hian local community, thingtlang mipuite chu a tir atanga teltir ve zel an tum thu leh awareness neih bakah hand holding neihpui pawh an tum thu a sawi.
Lengpui Airport-ah khual lo chhawn tur greeter dah an tum thu te, Mizoramin tourist infrastructure a nei sate dinhmun an zirchian mek thu leh din khawchhuahpui theih loh tur infrastructure-te hi chu mi mal kuta hlan mai a that zawk leh zawk loh an zirchian mek thu a sawi a. Unity mall sakna turin sorkar laipuiah Rs vbc 127 hu project proposal theh luh a nih tawh thu a sawi bawk.