- Ruata
Thla hmasa chawhnu lama tlangzarh Hyundai Creta hmel thar chu mipuiten an duh ngang mai a, tunah pawh hian book tu mi 51,000 an tling tawh.
Hyundai Creta hi India rama midsize SUV hralh kal ber pawl ni mek a ni a. A hmaa chhuak pawh kha India rama passenger car hralh kal zual 10 zingah pawh lang reng khawpa mi te duh leh lar a ni a. Tuna a thar rawn chhuak book tu an tam nghal danah pawh hian chuai lam chu sawiloh, a lar telh telh a, miten an duh telh telh mai ni te pawhin a lang a ni.
Hyundai Creta hi sawi tawh angin midsize SUV huanga mi, Kia Seltos te, Maruti Suzuki Grand Vitara leh adangte nena inel mek a ni a. He huang hi India rama lirthei leituten an lei tam huang niin lirthei huang luck tak a ni a tih theih a. Tuna Creta hmel thar nena a lo chhuak leh pawh hian Hyundai dinhmun pawh a rawn ti tha zual dawn hle niin a hriat a ni.
Hyunda Creta SUV model lineup-ah hian trim 7 leh khawl duhthlan tur chi thum – 160bhp pechhuak thei 1.5L turbo petrol, 115bhp pechhuak thei 1.5L petrol, leh 116bhp pechhuak thei 1.5L diesel te a awm a. Turbo-petrol engine thar hi a top-end SX (O) variant-ah chauh awmin he variant, turbo petrol khawl hmang hi Rs Nuai 20 man (ex-showroom) bawr vel a ni.
1.5L naturally aspirated petrol manual variant te hi Rs Nuai 11 – 17.24 man inkar niin, petrol khawl CVT hmang S (O), SX Tech, leh SX (O) variant-a awm te hi a indawt danin Rs Nuai 15.82, 17.45 leh 18.7 man te a ni bawk a. Diesel manual leh automatic variant te hi a indawt danin Rs Nuai 12.45 leh Rs Nuai 17.32 man te a ni bawk a. Heng a man tarlan te hi ex-showroom man zel a ni a, kawngpuia tlang tur chuan a man (on-road price) hi a sang veleh hret hlawm dawn a ni.
- Creta N Line chhuak hnai
He South Korea company hmingthang Hyundai hian an midsize SUV lar Creta hi N-Line model tihchhuah tumin ruahmanna an siam mek a. N-Line ho hi Hyundai in an lirthei te, design leh kentel sports zual tura an duan, brand lar leh lirthei mawi tak tak awmna a ni a. An lirthei lar sa ho Verna, i20 leh adangah pawh N-Line version hi kan lo hmu nual tawh a ni.
Hyundai Creta N Line-ah hian N-Line lirthei dangte design ang leh rawng leh zia te kan hmu dawn a. Hei bakah hian a suspension pawh an rawn khawih danglam dawn a ni. A hma grille design thar kan hmu bawk ang a, bumper thar, air inlet lian zawk nei vakah faux brushed aluminium hmanga chei a ni dawn bawk a. 18 inch alloy wheel a neih dawn bakah a side skirt leh a exhaust hmawr te N-Line dangho angin sports takin an rawn duang dawn bawk a ni.
A rawng lamah chuan Creta N Line hi N Line ho rawng bik Matte Grey leh Thunder Blue schemes te a nih leh hmel a. A chhung lamah hian N Line badging, all-black theme, three-spoke steering wheel thar, N Line logo a hnuai lama chuang, a dashboard rawng sena chei leh hmun hrang hranga ti N-Line design tura la sena thui hmanga cheina te kan hmu dawn bawk a ni.
Creta N-Line thar tur hian 160bhp pechhuak thei 1.5L turbo petrol engine, DCT automatic gearbox nena thlunzawm, emaw manual transmission duhthlan tur nen a rawn chhuah beisei a ni.
Hyundai Creta N-Line hi a lo chhuah hunah chuan sports car taka chei sa Creta SUV mawi tak kan hmu dawn tihna a ni a. A pangngai aia thlang pawh tam tak an awm a beiseiawm a. Creta lirthei pawh a chi hrang a rawn ti tamin market lamah pawh nasa taka a rawn puih ngei a beiseiawm a ni.